An kashe wani malamin addinin Musulunci, Sheikh Yahaya Ibrahim Masussuka, a hannun wasu ‘yan bindiga da ba a san ko su wanene ba, wadanda suka kai masa hari a kofar gidansa da ke Dutsin-Ma, a jihar Katsina.

An rawaito cewa an kashe malamin tare da wani bako mai suna Malam Adamu a yayin harin.

Wakilinmu ya samu labarin cewa maharan sun isa wurin ne a kan babur, kafin su kai hari kan malamin a gidansa.

Lamarin ya faru ne a daidai lokacin da Sheikh Masussuka ke shirye-shiryen gudanar da taron zaman lafiya da hadin kai, wanda aka tsara gudanarwa a ranar 31 ga watan Oktoba, 2026.

An yi niyyar cewa taron zai hada mutane wuri guda domin tattaunawa kan batutuwan da suka shafi zaman lafiya da hadin kai.

Kisan malamin da bakon nasa ya zo ne a daidai lokacin da ake ci gaba da nuna damuwa game da rashin tsaro a sassan jihar Katsina da sauran yankunan arewacin Najeriya, inda al’ummomi ke fuskantar hare-hare daga kungiyoyin ‘yan bindiga.

Rundunar ‘yan sandan jihar Katsina ta tabbatar da faruwar kisan, kamar yadda wata sanarwa da ta fitar a yammacin ranar Litinin ta nuna.

Sanarwar, wacce Kakakin rundunar ‘yan sandan, DSP Abubakar Sadiq Aliyu (ANIPR), ya sanya wa hannu a madadin Kwamishinan ‘Yan Sanda, ta bayyana cewa an garzaya da wadanda abin ya shafa zuwa asibiti mafi kusa bayan harin, amma likita ya tabbatar da cewa sun riga sun mutu.

“Rundunar ‘yan sandan jihar Katsina na sanar da mutuwar wani shahararren malamin addinin Musulunci, Sheikh Yahaya Ibrahim Masussuka, da abokinsa, Adamu Abubakar, cikin takaici, bayan wani hari da wasu da ake zargin ‘yan bindiga ne suka kai,” in ji sanarwar.

Rundunar ta ce nan take bayan samun rahoton lamarin, Jami’in ‘Yan Sanda mai kula da yankin Dutsin-Ma (DPO) ya jagoranci tawagar ‘yan sanda zuwa wurin da abin ya faru.

A halin yanzu, Kwamishinan ‘Yan sandan jihar Katsina, CP Ali Umar Fage, ya bayar da umarnin tura kwararrun jami’an tsaro da tawagogin aiki zuwa yankin domin gano tare da cafke wadanda ake zargin, wadanda suka gudu bayan aikata laifin.

Rundunar ta bayyana cewa an riga an fara gudanar da bincike, yayin da ake kara kaimi wajen gano ko su wanene wadanda suka aikata kisan, inda ake kokarin gano inda suke domin kama su. Kwamishinan ‘yan sanda ya kuma mika ta’aziyyarsa ga iyalai, abokai, da mabiyan marigayin, tare da mazauna garin Dutsin-Ma, dangane da wannan lamari.

Ya bai wa jama’a tabbacin cewa rundunar za ta ci gaba da kokarinta har sai an kama wadanda suka aikata laifin kuma an gurfanar da su gaban kuliya.

“Za a sanar da karin bayani nan gaba,” in ji ‘yan sandan.

Kungiyar Amnesty International ta yi Allah-wadai da kisan, inda ta yi kira ga hukumomin Najeriya da su gaggauta gudanar da cikakken bincike mai zurfi da adalci kan lamarin, tare da tabbatar da cewa duk wanda ake zargi da hannu a ciki ya fuskanci shari’a ta gaskiya.

Kungiyar ta kuma jaddada bukatar hukumomi su dauki matakai masu karfi don gano ainihin yadda harin ya faru, da kuma hukunta wadanda ke da alhakin aikata shi.

Amnesty International ta kara da cewa, marigayin malamin ya sha fuskantar barazanar kisa da kuma tsoratarwa a tsawon rayuwarsa, lamarin da ya haifar da damuwa game da yanayin da ya shafi kisan nasa.

Wannan Allah-wadai daga kungiyar ya zo ne a daidai lokacin da ake ci gaba da yin kira da a kare shugabannin addini da sauran mutanen da ke fafutukar ganin an samu zaman lafiya da fahimtar juna, tare da yin magana a kan hadarin tsattsauran ra’ayi mai cike da tashin hankali.