Gwamnatin Jihar Katsina ta bayyana cewa za ta kaddamar da Gasar Kwallon Kafa ta Malam Dikko Umaru Radda tsakanin unguwanni a ranar Laraba, 28 ga watan Oktoba, 2026. Wannan mataki wani bangare ne na kokarin bunkasa wasanni a matakin tushe da kuma karfafa matasa.

Kwamishinan Matasa da Bunkasa Wasanni, Injiniya Surajo Yazeed Abukur, PhD, ne ya bayyana hakan yayin wani taron manema labarai a Katsina.

Ya bayyana cewa gasar, wacce Majalisar Zartarwa ta Jiha ta amince da ita a taronta na 16, za ta shafi dukkan unguwanni 361 da ke fadin jihar.

A cewar Kwamishinan, an shirya gasar ne domin gano hazikan ‘yan wasan kwallon kafa da ba a san su ba, inganta ladabi da aiki tare a matsayin kungiya, karfafa hadin kan al’umma, da kuma samar da damammaki ga matasa ‘yan wasa don samun ci gaba zuwa matakin kwarewa.

Ya ce za a gudanar da wasannin a matakai daban-daban ta hanyar tsarin rukuni da kuma tsarin fitar da wanda ya yi rashin nasara (knockout), tare da samar da cibiyoyin karbar bakuncin wasanni a wurare masu saukin isa, domin rage yawan tafiye-tafiye ga kungiyoyin da ke shiga gasar.

Injiniya Abukur ya kara da cewa, ‘yan wasan da suka nuna kwarewa ta musamman za su samu damar samun karin horo, tantancewa, da kuma shiga cikin shirye-shiryen bunkasa kwallon kafa.

Kwamishinan ya lura cewa wannan shiri ya zo ne a daidai lokacin da Gwamna Malam Dikko Umaru Radda ke nuna jajircewa wajen bunkasa wasanni, wanda ya hada da shirye-shiryen inganta Filin Wasa na Charanchi, da kuma gina filayen kwallon kafa na zamani (masu ciyawar roba) da suka cika ka’idojin FIFA a Malumfashi da Funtua.

Ya sanar da cewa za a kaddamar da gasar a hukumance da karfe hudu na yamma a Filin Wasa na Funtua, a ranar da aka tsara Gwamnan zai kaddamar da ayyukan yakin neman zabensa a garin.

Kwamishinan ya yi kira ga masoya kwallon kafa, kungiyoyin matasa, kungiyoyin wasanni, shugabannin al’umma, da sauran jama’a da su halarci taron tare da bayar da goyon baya ga wannan shiri.