Shugaba Bola Ahmed Tinubu ya amince da murabus ɗin Sufeto Janar na ‘Yan Sanda, Kayode Egbetokun, “bayan gabatar da wasiƙarsa tana mai nuni da muhimman abubuwan da suka shafi iyali”.

“Shugaba Tinubu ya karɓi murabus ɗin Mista Egbetokun a safiyar yau kuma ya nuna matuƙar godiyarsa ga ayyukan da Egbetokun ya yi na tsawon shekaru da dama ga Rundunar ‘Yan Sandan Najeriya da kuma ƙasa,” in ji Bayo Onanuga, Mai Ba da Shawara na Musamman ga Shugaban Ƙasa kan Labarai da Dabaru a cikin wata sanarwa a ranar Talata.

“Shugaban ya amince da sadaukarwarsa, ƙwarewa, da kuma jajircewarsa wajen ƙarfafa tsarin tsaron cikin gida a lokacin da yake kan mulki.”

An naɗa Egbetokun a watan Yunin 2023, yana wa’adin shekaru huɗu da za a ƙare a watan Yunin 2027, bisa ga tanadin da aka yi wa Dokar ‘Yan Sanda.

Fadar Shugaban Ƙasa ta kuma tabbatar da naɗin Mataimakin Sufeto Janar na ‘Yan Sanda Tunji Disu don yin aiki a matsayin Sufeto Janar na riƙo nan take.

Onanuga ya ce, “Saboda kalubalen tsaro da kasar ke fuskanta a yanzu, da kuma yin aiki bisa ga dokoki da jagororin doka da ke akwai, Shugaba Tinubu ya amince da nadin Mataimakin Sufeto Janar na ‘Yan Sanda Tunji Disu don ya yi aiki a matsayin Mukaddashin Sufeto Janar na ‘Yan Sanda nan take.

“Shugaban kasar yana da yakinin cewa kwarewar AIG Disu, zurfin aiki, da kuma karfin jagoranci da ya nuna zai samar da alkibla mai dorewa ga rundunar ‘yan sandan Najeriya a wannan mawuyacin lokaci.”

“Dangane da tanade-tanaden Dokar ‘Yan Sanda ta 2020, Shugaba Tinubu zai kira taron Majalisar ‘Yan Sandan Najeriya nan ba da jimawa ba domin yin la’akari da nadin AIG Disu a matsayin Babban Sufeto Janar na ‘Yan Sanda, bayan haka za a mika sunansa ga Majalisar Dattawa don tabbatarwa,” in ji sanarwar.