Mazauna karamar hukumar Jibia a jihar Katsina a wani taron zaman lafiya sun cimma matsaya da ‘yan fashi da makami domin kawo karshen tashe-tashen hankula da rashin tsaro da aka shafe shekaru ana yi a yankin.

A wani bangare na sasantawa, ‘yan bindigar sun mika bindigogi kirar AK-47 guda biyu tare da amsa cewa sun yi garkuwa da mutane 10 daga garin Daddara, wadanda a halin yanzu an sako su kuma an kai su babban asibitin Jibia domin kula da lafiyarsu.

Taron zaman lafiya da aka gudanar a ranar Juma’a 28 ga watan Fabrairu, 2025 a kauyen Kwari, kungiyar Jibia People’s Forum karkashin jagorancin Alhaji Gide Dahiru ce ta dauki nauyin gudanar da taron.

Wani mai sharhi kan harkokin tsaro kuma kwararre kan yaki da ta’addanci a yankin tafkin Chadi, Zagazola, ya bayyana a ranar Litinin cewa shugabannin al’umma da suka hada da shugaban kungiyar ‘yan kasuwa ta Jibia, Alhaji Sama’ila Mai Maasara da kuma dattijon jihar Alhaji Haruna Sada Zare, sun halarci taron sulhun.

A cewar rahoton, Sheikh Barista Ibrahim Sabi’u, tsohon sakataren hukumar shari’ar musulunci, kuma alkali a kotun sulhu ta jihar Katsina, ya jaddada cewa an gudanar da tattaunawar ne a karkashin shari’ar Musulunci domin tabbatar da zaman lafiya mai dorewa.

Kamar yadda jaridar Hikaya ta ruwaito, fitattun jagororin ‘yan fashin nan Audu Lankai da Tukur Najeriya na daga cikin wadanda suka yi aikin samar da zaman lafiya.

Sai dai a wani bangare na yarjejeniyar, mazauna yankin sun bukaci a dakatar da kai hare-hare a garin Jibia da kewaye, da kariya ga manoma da kuma kawo karshen satar shanu.

A halin da ake ciki, ‘yan fashin, sun yi alkawarin mutunta dokokin gwamnati da kuma dakatar da satar shanu da sauran ayyukan muggan laifuka.

Zagazola ya kara da cewa, Alhaji Babangida Bracket, mazaunin Daddara, ya tabbatar da sakin wadanda aka yi garkuwa da su, wanda hakan ke nuna cewa za a iya kawo sauyi a kokarin da ake na tabbatar da tsaro a jihar Katsina.