A yayin da ake ta cece-kuce kan rufe makarantu na watan Ramadan, Ma’aikatar Ilimi ta kasa da Sakandare ta Jihar Katsina, ta bakin jami’in hulda da jama’a, Sani Danjuma, a ranar Talata ya ce gwamnati ta shirya karin darussa na musamman ga ‘yan takarar manyan makarantun Sakandare (SSCE) a makarantun gwamnati, masu zaman kansu, da kuma na al’umma.

Ya kare matakin rufe makarantu a lokacin azumin Ramadan, yana mai jaddada cewa za a rage tabarbarewar ilimi duk da damuwar da jihar ke fama da ita kan yawan yaran da ba sa zuwa makaranta yana mai bayanin cewa matakin na da nufin daidaita harkokin addini tare da ci gaban ilimi.

Sanarwar ta ce, “A matsayin martani ga tattaunawar da ake ci gaba da yi game da ayyukan makarantu, ma’aikatar ta bullo da dabarun da za a rage tabarbarewar ilimi tare da fahimtar kalubalen da Ramadan ke fuskanta.”

Ya kuma bayyana cewa, shawarar ta yi la’akari da matsanancin yanayi a arewacin Najeriya da kuma irin matsalolin da dalibai da malamai ke fuskanta a lokacin azumi tare da tunatar da jama’a kan wata dokar jihar da ta tilasta rufe makarantu a cikin watan Ramadan.

Kungiyoyi da daidaikun jama’a da dama sun nuna damuwarsu kan tasirin rufewar musamman lokacin da ya kamata dalibai su shirya jarabawar kasa daban-daban da ke tsakanin lokacin da kuma bayan Ramadan.

Ma’aikatar ta ba da tabbacin cewa za a tsara karin darussan da aka shirya tun daga ranar 3 ga Maris, 2025, don daukar nauyin dalibai da malaman da ke gudanar da azumin watan Ramadan tare da la’akari da yanayin muhalli.