Gwamnan Jihar Katsina, Malam Dikko Umaru Radda, ya bai wa al’ummar ƙaramar hukumar Kankia tabbacin samun ƙarin ayyukan ci gaba, musamman a fannonin hanyoyi, kiwon lafiya, da gine-ginen addini.
Gwamnan ya bayyana hakan ne a yayin taron yaƙin neman zaɓe na Tinubu–Dikko–Jobe na shekarar 2027 a Kankia, inda ya nuna godiyarsa ga jama’a bisa fitowarsu mai yawa da kuma nuna halin natsuwa da zaman lafiya.
“Kun nuna ƙauna da goyon baya mai girma, tun daga ƙofar shiga gari har zuwa wannan fili. Kun nuna cewa al’ummar Kankia sun yi imani da shugabanci na gari da siyasar zaman lafiya, ba siyasar dambe ko tashin hankali ba,” in ji Radda.
Ya yabi wasu fitattun ‘yan asalin Kankia saboda gudummawar da suke bayarwa ga jihar da ƙasar baki ɗaya, ciki har da Ministan Gidaje da Ci Gaban Birane, Architect Ahmad Musa Dangiwa; Mashawarcin Shari’a na jam’iyyar APC na ƙasa, Barrister Murtala Aliyu Kankia; da kuma Mashawarcinsa na Musamman kan Harkokin Wutar Lantarki da Makamashi, Dr. Hafiz Ahmed Ibrahim.
Ya bai wa jama’a tabbacin cewa ayyukan da ake gudanarwa a halin yanzu, waɗanda suka haɗa da hanyoyi, masallatai, da Babban Asibitin Kankia, za su ci gaba.
“Jama’ata, dukkan alherin da muka kawo muku ya samo asali ne daga yadda nake ɗaukar ku a matsayin ‘yan uwa. Da yardar Allah, za mu ci gaba da kawo ƙarin ayyukan ci gaba a Kankia,” in ji shi.
Dangane da zaɓen shekarar 2027, Gwamna Radda ya gode wa al’ummar Kankia bisa alƙawarin goyon bayan Shugaba Bola Ahmed Tinubu, Mataimakin Shugaba Kashim Shettima, da dukkan ‘yan takarar jam’iyyar APC.
“Ina godiya da alƙawarin da kuka yi na goyon bayan APC daga sama har ƙasa. Allah Ya saka muku da alheri, kuma Ya ba mu zaɓe mai cike da zaman lafiya,” in ji shi.
Tun da farko, Darakta-Janar na ƙungiyar yaƙin neman zaɓe ta Tinubu–Dikko–Jobe, Architect Ahmad Musa Dangiwa, ya gode wa Gwamna Radda bisa amincewa da ‘yan asalin Kankia ta hanyar ba su muƙamai daban-daban.
Dangiwa ya bayyana cewa Gwamna Radda ne ya ba da shawarar a naɗa shi a matsayin minista. “Duk wanda ya ce wani daban ne ya tsayar da ni, to karya yake yi. Gwamna Dikko Umaru Radda ne ya ba da shawarar a zabi ni, kuma ya tura sunana zuwa Abuja. Zan ci gaba da nuna godiyata a gare shi saboda wannan amincewa da ya nuna mini,” in ji shi.
Ya bayyana cewa yankin Kankia ya ci gajiyar ayyukan gina hanyoyi da gidaje ta hanyar ofishinsa, ciki har da ayyukan da aka gudanar a kewayen Jami’ar Umaru Musa Yar’Adua. Haka kuma, Gwamnan ya ware miliyoyin nairori domin gyaran hanyar Kankia, tare da alkawarin kawo karin ayyuka nan gaba.
A nasa jawabin, Mai Ba da Shawara na Musamman kan Harkokin Wutar Lantarki da Makamashi, Dr. Hafiz Ahmed Ibrahim, ya ce al’ummar Kankia sun taru ne domin nuna godiya ga Gwamnan bisa ayyuka da dama da damammakin da ya samar musu.
“Za mu zabi jam’iyyar APC daga sama har kasa, insha Allahu — tun daga Majalisar Dokokin Jiha da Majalisar Dokokin Tarayya, har zuwa zaben Gwamna da na Shugaban Kasa, ciki har da Shugaba Bola Ahmed Tinubu,” in ji shi.
Shugaban jam’iyyar APC na Jihar Katsina, Hon. Dr. Bishir Gambo Saulawa, tare da sauran ‘yan takara da shugabannin jam’iyyar — wadanda suka hada da Kakakin Majalisar Dokokin Jiha, Nasiru Yahaya Daura; Hon. Mustapha Muhammad Kanti Bello; Hon. Bishir Ibrahim Gyaza; da Shugaban Karamar Hukumar Kankia, Hon. Lawal Gezzy — su ma sun nuna godiyarsu ga Gwamnan tare da yin alkawarin ci gaba da ba shi goyon baya.
Mataimakin Gwamna, Alhaji Faruk Lawal Jobe, da mambobin Majalisar Zartarwa ta Jiha, shugabannin jam’iyya, da sauran masu ruwa da tsaki, sun halarci taron.
Ibrahim Kaula Mohammed
Babban Sakataren Yada Labarai na Gwamnan Jihar Katsina
19 ga Nuwamba, 2026























