- Ya bayyana cewa an riga an fitar da kusan kashi 70 cikin 100 na kudaden aikin samar da ruwa na Zobe
Gwamnan Jihar Katsina, Malam Dikko Umaru Radda, ya bayyana ci gaban da aka samu a aikin samar da ruwa na Zobe, inda ya sanar da cewa an riga an biya dan kwangilar aikin kusan kashi 70 cikin 100 na kudaden da aka ware. Ana sa ran aikin zai inganta samar da ruwan sha a kananan hukumomi kusan takwas, ciki har da karamar hukumar Kankia.
Gwamnan ya bayyana hakan ne yayin ziyarar da ya kai wa Hakimin Kankia, Alhaji Musa Hassan Sada Kankia, a matsayin wani bangare na ayyukan yakin neman zabe na Tinubu–Dikko–Jobe na shekarar 2027. A yayin ziyarar, ya kuma yi magana kan ayyukan gina hanyoyi, biyan hakkokin masu ritaya, da sauran shirye-shiryen ci gaba.
Yayin da yake bayyana Kankia a matsayin gida, Gwamna Radda ya ce ziyarar tasa dama ce ta karfafa alakar dangi da ta gargajiya, tare da neman addu’o’i da shawarwari daga masarautar gargajiya.
Ya ce, “Mun zo fadar ku a yau ne domin karfafa alakar dangi da zumunci. Duk lokacin da na zo wannan yanki, kan ce na dawo gida ne don sake haduwa da mutanena. Wannan gida ne na iyali, kuma a gare mu, Kankia karamar hukuma ce ta ‘yan uwa.”
Gwamnan ya nuna godiyarsa ga mazauna yankin bisa tarbar da suka yi masa, inda ya lura cewa sun jeru a gefen hanyoyi tun daga bakin shiga garin har zuwa wurin taron domin tarbar tawagarsa.
Dangane da aikin samar da ruwa na Zobe, ya bayyana ci gaban da aka samu a matsayin mai gamsarwa, yana mai nuni da cewa aikin ya dade yana jinkiri na tsawon sama da shekaru arba’in a karkashin gwamnatocin da suka shude.
Ya ce, “A yau, ina farin cikin sanar da cewa an riga an shimfida bututun ruwa, kuma aikin ginin yana ci gaba a kan layin aikin, ciki har da birnin Katsina da kuma Kankia, inda aka gina tashar kara karfin matsi na ruwa (booster station).”
Ya bayyana cewa aikin zai amfani kananan hukumomi kusan takwas, musamman al’ummomin da suka dade suna fuskantar karancin ruwan sha.
Gwamna Radda ya bayyana cewa an riga an biya dan kwangilar aikin kusan kashi 70 cikin 100 na kudaden, inda ya nuna kwarin gwiwar cewa nan ba da jimawa ba mazauna yankin za su samu ingantaccen ruwan sha a kai a kai. Ya kara da cewa, aikin na daga cikin manyan shirye-shiryen gwamnatinsa na inganta ababen more rayuwa, wadanda suka hada da gina hanyoyi a fadin jihar.
Dangane da hakkokin masu ritaya, Gwamnan ya tunatar da cewa, an shafe kimanin shekaru hudu zuwa biyar—tun daga shekarar 2019 kafin hawan gwamnatinsa—ba tare da an biya kudaden sallama da na fansho ba.
Ya ce, “Da ikon Allah, wannan gwamnati ta biya sama da Naira biliyan 40 a matsayin kudaden sallama ga ma’aikatan gwamnati da suka yi ritaya, da kuma iyalai na ma’aikatan da suka rasu.”
Ya bayyana cewa, matakan da gwamnatinsa ta dauka a fannin kudi sun ba da damar aiwatar da manyan ayyuka, tare da tallafawa kananan hukumomi wajen gudanar da shirye-shiryen ci gaba.
Gwamna Radda ya nuna godiya ga mutanen Kankia bisa goyon bayan da suka ba shi a lokacin zaben 2023. Haka kuma, ya jinjinawa gudummawar da Shugaba Bola Ahmed Tinubu, Mataimakin Shugaba Kashim Shettima, da tsohon Shugaban kasa marigayi Muhammadu Buhari suka bayar a tafiyarsa ta siyasa.
Ya kuma ambaci ‘yan takarar da ke neman mukamai daban-daban, wadanda suka hada da Kakakin Majalisar Dokokin Jihar Katsina, Hon. Nasiru Yahaya Daura (mai neman kujerar Sanatan Daura); Hon. Mustapha Muhammad Kanti Bello (mai neman kujerar wakilcin mazabar Kankia–Ingawa–Kusada a Majalisar Wakilai ta Tarayya); da kuma Hon. Bishir Ibrahim Gyaza (mai neman kujerar Majalisar Dokokin Jihar Katsina daga Kankia).
A baya, Hakimin Kankia, Alhaji Musa Hassan Sada, ya yaba wa Gwamna Radda saboda ayyukan da ya gudanar a fannonin samar da ruwa, ilimi, kiwon lafiya, gine-ginen addini, da kuma kula da masarautu da tsarin gargajiya.
Ya ce, “Ba sai an yi dogon yabo ba, tunda ayyukan Gwamnan da matakan da ya dauka sun yi magana da kansu. Abin da ya dace mu yi masa shi ne nuna godiya ta gaskiya saboda dimbin ayyukan da gwamnatinsa ta yi wa al’ummarmu.”
Basaraken ya bayyana yadda aka gyara babban masallacin garin, inda ya ce an hanzarta aikin bayan Gwamnan ya lura da rashin wasu muhimman abubuwa, kamar ruwa da mumbari. Ya kuma yaba da inganta tsarin gina masallatai.
Game da samar da ruwa, ya bayyana cewa an fara aikin tono kasa, an kawo kayan aiki, kuma ana ci gaba da aikin rijiyoyin burtsatse, na’urorin tura ruwa, da shimfida bututun ruwa.
Haka kuma, ya yaba da kafa makarantar kwana ta musamman domin yaran da suka fito daga iyalai marasa galihu, inda ya bayyana hakan a matsayin wani muhimmin mataki na inganta ilimi. Hakimin ya kuma nuna godiya kan goyon bayan da gwamnatin ke bai wa masarautu da sauran cibiyoyin gargajiya, wanda ya hada da ninka alawus-alawus na bukukuwan Hawan Sallah, da sake duba matakan albashi, da kuma biyan bashin kudaden da ake bin gwamnati a baya.
Ya ce, “Kun kara mana alawus-alawus na bukukuwan Hawan Sallah, har ma kun ninka su gaba daya. Wannan goyon baya ya zarce yadda muka yi tsammani.”
Ya kuma yi nuni da samar da abubuwan sufuri, masauki, da biyan wasu kudade ga shugabannin gargajiya da suka halarci tarurrukan hukuma a Katsina.
Hakimin ya yaba da nadin ‘yan asalin Kankia guda biyu a matsayin Sakatarorin Dindindin, da kuma nada wasu ‘yan asalin yankin a mukaman gwamnati. Musamman ma, ya nuna godiya ga Mashawarci na Musamman kan Harkokin Wutar Lantarki da Makamashi, Dr. Hafiz Ahmed Ibrahim, bisa samar da na’urar samar da wutar lantarki (janareta) da sauran kayan aikin wutar lantarki daga aljihunsa, domin tallafawa ayyukan al’umma.
Ya kuma yaba da goyon bayan da Gwamna ke bayarwa wajen rarraba Zakka da Wakafi, tare da yin kira da a sake duba wasu buƙatu da al’ummar yankin suka gabatar a baya wadanda har yanzu ba a biya su ba.
Ya ce, “Muna rokon ku da ku duba buƙatun da muka gabatar a baya, ku kuma sake duba su. Muna da yakinin cewa za a ba su kulawar da ta dace, domin al’ummarmu ta samu abin da take bukata.”
Shugaban gargajiyar ya yi kira ga masu rike da mukaman gwamnati da sauran al’umma da su kasance masu tsoron Allah, hakuri, gaskiya, da kuma zama lafiya da juna, tare da guje wa duk wani abu da ka iya haifar da rarrabuwar kawuna.
A nasa bangaren, Shugaban Karamar Hukumar Kankia, Alhaji Lawal Abdullahi Geezy, ya nuna godiya ga Gwamna bisa ayyukan da ya kawo yankin, musamman shirin gyara Dam din Kankia, sake gina Masallacin Izala, da kuma ci gaba da ayyukan inganta Asibitin Kankia.
Ya tunatar da cewa an dade ana kira a gyara Dam din, kuma ya yaba wa gwamnati bisa jajircewarta wajen magance wannan kalubale.
Shugaban ya bayyana cewa an rushe tsohon ginin Masallacin Izala domin gina sabon tsari na zamani a wurin. Ya kuma yi nuni da ayyukan da ake gudanarwa a asibitin, wadanda suka hada da samar da wutar lantarki da kuma gina karin gine-gine.
Daga cikin wadanda suka halarci taron akwai Mataimakin Gwamnan Jihar Katsina, Hon. Faruk Lawal Jobe; Darakta Janar na kungiyar yakin neman zaben Tinubu–Dikko–Jobe, Architect Ahmed Musa Dangiwa; Kakakin Majalisar Dokokin Jihar Katsina, Hon. Nasiru Yahaya Daura; mambobin kwamitin yakin neman zabe; shugabannin gargajiya; malamai; mambobin Majalisar Zartarwa ta Jihar Katsina; ‘yan takarar siyasa; shugabannin jam’iyyu; da sauran masu ruwa da tsaki.
Ibrahim Kaula Mohammed
Babban Sakataren Yada Labarai na Gwamnan Jihar Katsina
19 ga Nuwamba, 2026













