• Ya Yabi Mataimakiyarsa, Hajiya Hafsat Abdullahi, kan Shirin Tallafawa Mata da Marayu 1,000 da Jimillar Naira Miliyan 10

Gwamnan Jihar Katsina, Malam Dikko Umaru Radda, ya yi alƙawarin samar da asibiti da fitilun tituna ga al’ummar Yar’Barza da ke ƙaramar hukumar Batagarawa, tare da duba yiwuwar inganta hanyoyin sadarwa a yankin.

Gwamnan ya yi wannan alƙawari ne a ranar Litinin yayin ƙaddamar da wani shirin tallafawa al’umma wanda Hajiya Hafsat Abdullahi, Mataimakiyar Gwamna kan Harkokin Protocol II kuma shugabar ƙungiyar ‘Women Network for Dikko’, ta shirya tare da haɗin gwiwar ƙungiyar ‘Northern Women Political Awareness’. Shirin ya yi nufin tallafawa mata da marayu 1,000 da ba su da ƙarfin tattalin arziki, inda kowannensu ya samu tallafin Naira 10,000.

Gwamna Radda ya yabi Hajiya Hafsat kan wannan yunƙuri, inda ya bayyana shi a matsayin gudummawa mai kyau ga ci gaban al’umma a matakin tushe, da kuma nuna jajircewa wajen inganta rayuwar marasa galihu a cikin al’umma.

“Muna godiya ga Allah Madaukakin Sarki da Ya ba mu damar halartar wannan taro. Muna yabon Hajiya Hafsat saboda tallafawa marasa galihu da kuma taimakawa ƙoƙarin gwamnati na inganta rayuwar jama’a,” in ji shi.

Gwamnan ya bayyana cewa gwamnatinsa za ta ci gaba da ƙarfafa mutane da ƙungiyoyin da ke aiwatar da shirye-shiryen da ke kawo amfani kai tsaye ga al’ummominsu.

“Duk lokacin da mutanenmu suka aiwatar da shirye-shirye irin wannan, muna ƙoƙarin nuna goyon baya a gare su tare da ƙaddamar da shirye-shiryen a hukumance. Ta haka muke ƙarfafa ayyukan hidimar al’umma da tallafawa marasa galihu,” in ji shi.

Da yake mayar da martani ga buƙatun da al’ummar yankin suka gabatar, Gwamna Radda ya ba mazauna yankin tabbacin cewa gwamnati za ta yi aiki don samar da asibiti da fitilun tituna, tare da duba yiwuwar haɗin gwiwa da shirin ‘Rural Access and Agricultural Marketing Project’ (RAAMP) domin inganta hanyoyi.

Ya kuma yabi al’ummar Yar’Barza bisa fitowarsu mai yawa da kuma goyon bayan da suka bai wa shirin tallafin.

Tun da farko, Hajiya Hafsat Abdullahi, Mataimakiyar Gwamna kan Harkokin Protocol II, ta gode wa Gwamna Radda bisa samar da dama ga daidaikun mutane da ƙungiyoyi don bayar da gudummawa ga ci gaban al’umma. “Jagoranmu, Gwamna Radda, ya samar mana da dandamali don samun ci gaba. Kasancewarsa a nan yau domin kaddamar da wannan shirin karfafa al’umma a garinmu, wani lokaci ne na tarihi da ba za a manta da shi ba a gare mu,” in ji ta.

Ta yaba wa Gwamnan bisa goyon bayan da yake bai wa shirye-shiryen karfafa al’umma daban-daban a fadin jihar, inda ta bayyana cewa karfafa gwiwar da ya ba ta ne ya zaburar da ita wajen mika tallafi ga mata marasa galihu da marayu.

Hajiya Hafsat ta yi kira ga gwamnatin jiha da ta gina tare da gyara hanyoyi a yankunan, ta samar da asibiti, sannan ta sanya fitilun kan titi a Yar’Barza, domin inganta harkokin kiwon lafiya, sufuri, da tsaro.

Ta bayyana kwarin gwiwar cewa Gwamnan zai duba wadannan buƙatu, tare da sake jaddada kudirinta na ci gaba da tallafa wa marasa karfi a cikin al’umma.

Haka kuma, Shugaban Karamar Hukumar Batagarawa, Hon. Lawal Yahaya Kawo, ya bayyana farin cikinsa game da shirin a madadin karamar hukumar da mazaunanta.

Ya yaba wa Gwamna Radda bisa halartar taron, sannan ya jinjina wa Hajiya Hafsat bisa kirkirar wannan shiri na karfafa al’umma, wanda ya shafi mata marasa galihu da marayu guda 1,000.

Shugaban ya bayyana cewa, wannan mataki ya nuna muhimmancin ayyukan da al’umma suka dauki nauyinsu wajen taimaka wa kokarin gwamnati na inganta rayuwar marasa karfi.

Daga cikin wadanda suka halarci taron akwai Mataimakin Gwamna, Hon. Faruk Lawal Jobe; mambobin Majalisar Zartarwa ta Jihar Katsina; da sauran manyan jami’an gwamnati.

Ibrahim Kaula Mohammed

Babban Sakataren Yada Labarai na Gwamnan Jihar Katsina

19 ga Oktoba, 2026