Gwamnan Jihar Katsina, Malam Dikko Umaru Radda, ya nemi a zurfafa haɗin gwiwa da Hukumar Kula da Bayanan Shaida ta Kasa (NIMC) domin inganta tsarin kula da bayanan shaida a jihar, tare da haɗa tsarin kula da bayanan shaida na Jihar Katsina da tsarin kasa baki ɗaya.

Gwamna Radda ya yi wannan kiran ne yayin ziyarar ban girma da ya kai wa Darakta-Janar kuma Shugabar Hukumar NIMC, Injiniya Abisoye Coker-Odusote, a Abuja.

Gwamnan ya bayyana cewa, samun ingantattun bayanan shaida ba wai kawai buƙata ce ta gudanar da aiki ba, a’a, tushe ne mai matukar muhimmanci ga ingantacciyar shugabanci, tsare-tsare masu dogaro da hujjoji, kare walwalar al’umma, karfafa tattalin arziki, da kuma samar da ayyukan gwamnati yadda ya kamata.

Ya bayyana cewa Jihar Katsina na aiki don haɗa dukkan kokarinta na kula da bayanan shaida zuwa wani tsari mai karfi da zai taimaka wa gwamnati ta fahimci al’ummarta sosai, ta gano al’ummomin da ke cikin mawuyacin hali, tare da tabbatar da cewa shirye-shiryen ci gaba sun isa ga wadanda aka yi su domin su.

Gwamna Radda ya jaddada bukatar yin amfani da kwarewar fasaha da kayan aikin hukumar NIMC na kasa domin karfafa tsarin bayanan shaida na jihar, ta yadda zai biya takamaiman bukatun Katsina.

Ya nuna damuwarsa game da yadda har yanzu ba a yi wa babban kaso na ‘yan kasa rajista a tsarin kasa ba, musamman wadanda ke zaune a yankunan karkara da wuraren da ke da wuyar shiga, inda ya yi kira da a dauki matakan hadin gwiwa don hanzarta yin rajistar da kuma cike gibin da ake da shi.

Gwamnan ya ce haɗin gwiwar da ake shirin kulla wa zai binciko hanyoyin fadada wuraren yin rajista, kara wayar da kan jama’a, karfafa hadin gwiwa da hukumomin gida, da kuma amfani da fasaha domin saukaka hanyar yin rajista a fadin jihar.

Da take mayar da martani, Darakta-Janar kuma Shugabar Hukumar NIMC, Injiniya Abisoye Coker-Odusote, ta yi maraba da matakin da Gwamnatin Jihar Katsina ta dauka, tare da sake jaddada kudirin hukumar na yin aiki tare da jihar domin fadada ayyukan rajista da kuma samar da tsarin bayanan shaida mai hadewa da kuma samar da dama ga kowa.

Ta ba da tabbacin cewa NIMC za ta samar da tallafin fasaha da ake bukata domin cimma manufofin wannan haɗin gwiwa.

A matsayin sakamakon farko na wannan tattaunawa, bangarorin biyu sun amince su kafa wata tawagar kwararru ta musamman (Technical Working Group – TWG) domin tsara tsarin aiki da kuma shirya daftarin yarjejeniyar fahimtar juna (MoU) game da wannan haɗin gwiwa. Wannan ƙungiyar aiki za ta ƙunshi wakilai daga Sashen Kula da Bayanan Shaida na NIMC, Babban Mai Ba da Shawara na Jiha, Darakta-Janar na Hukumar Kula da Fasahar Sadarwa da Bayanai ta Jihar Katsina (KATDICT), Babban Jami’in Kididdiga na Jiha, da kuma Babban Sakataren Hukumar Kula da Ci gaban Jihar Katsina (KTDMB).

Ana sa ran ƙungiyar za ta yi nazari kan tsarin bayanan shaida da ake da shi a yanzu, ta gano fannonin da za a iya haɗewa da kuma ingantawa, sannan ta tsara ingantaccen tsarin haɗin gwiwa cikin makonni takwas, wanda zai kai ga nazari da kuma sanya hannu kan Yarjejeniyar Haɗin Gwiwa (MoU).

Gwamna Radda ya sake jaddada kudirin gwamnatinsa na samar da tsarin shugabanci mai dogaro da bayanai tare da mayar da hankali kan bukatun jama’a, inda ake amfani da ingantattun bayanai wajen yanke shawarwari masu kyau da kuma tabbatar da cewa ba a bar wani ɗan ƙasa a baya ba.

A yayin wannan ziyara, sun raka Gwamnan sun haɗa da Shugaban Ma’aikatan Gwamnati, Alhaji Abdulkadir Mamman Nasir; da Babban Mai Ba da Shawara kan Harkokin Dangantaka tsakanin Hukumomin Gwamnati; da Babban Mai Ba da Shawara na Jiha; da kuma Babban Sakataren Hukumar KTDMB.

Ibrahim Kaula Mohammed
Babban Sakataren Yada Labarai na Gwamnan Jihar Katsina

08 ga Oktoba, 2026