Gwamnan Jihar Katsina, Malam Dikko Umaru Radda, ya bayyana cewa kudin shiga na cikin gida (IGR) na jihar ya karu daga Naira miliyan 600 a wata a shekarar 2023 zuwa sama da Naira biliyan 3 a wata a shekarar 2026.

Gwamna Radda ya bayyana hakan ne a ranar Alhamis yayin da yake jawabi a matsayin daya daga cikin masu tattaunawa a wajen kaddamar da rahoton “Nigeria Development Update” na Bankin Duniya da aka gudanar a Otal din Sheraton da ke Abuja, mai taken “Bayan Asusun Tarayya: Yadda Karin Kudin Shiga ya Canza Tsarin Abubuwan da Jihohi suka sa a Gaba”.

A cewarsa, gwamnatinsa ta yi amfani da karin kudaden da aka samu daga asusun tarayya (FAAC)—wadanda suka samo asali daga gyare-gyaren tattalin arziki da Shugaba Bola Ahmed Tinubu ya aiwatar—ta hanyar da ta dace wajen bunkasa muhimman bangarori.

A bangaren kiwon lafiya, ya bayyana ayyukan da suka hada da sake gina da samar da kayan aiki a cibiyoyin kiwon lafiya na matakin farko (PHC) sama da 270; kafa tsarin motocin daukar marasa lafiya (ambulans) na zamani guda 15; inganta cibiyoyin kiwon lafiya guda 6 zuwa manyan asibitocin gari (General Hospitals); kafa cibiyar wanke koda (dialysis) ta zamani da cibiyar daukar hotunan jiki da kula da masu cutar daji; tare da daukar ma’aikatan kiwon lafiya sama da 2,000 aiki.

A bangaren ilimi, Gwamnan ya bayyana cewa gwamnatinsa ta gina sabbin makarantu sama da 170, ta gyara makarantu sama da 500, ta gina sabbin makarantu na musamman (model schools) guda 3, ta dauki malamai sama da 10,000 aiki, tare da horar da malamai sama da 25,000.

A bangaren noma, Gwamna Radda ya ce jihar Katsina ta aiwatar da babban shirin noma na zamani (mechanization) wanda ya fi na kowace jiha girma a Najeriya, inda aka samar da taraktoci na zamani sama da 400 da dubban kayan aikin noma na zamani. Ya kara da cewa an horar da matasa sama da 1,000 tare da ba su tallafin kudi don gudanar da harkokin kasuwancin noma; ana rarraba takin zamani sama da tan 60,000 duk shekara; sannan an rarraba kayan aikin ban-ruwa sama da 5,000 ga manoma, lamarin da ya sanya Katsina ta zama daya daga cikin jihohin da farashin kayan abinci ya fi sauki. Dangane da batun tafiyar da harkokin kuɗi, Gwamna Radda ya bayyana cewa baya ga karuwar kudaden shiga na cikin gida (IGR), bashin cikin gida na jihar ya ragu daga Naira biliyan 62 a shekarar 2022 zuwa Naira biliyan 14 a shekarar 2025.

Ya kuma bayyana cewa yawan masu fama da matsalar rashin abinci mai gina jiki a jihar ya ragu da kashi 7 cikin dari, yayin da adadin yaran da ba sa zuwa makaranta ya ragu daga sama da 500,000 zuwa kusan 200,000. Ya sake jaddada cewa gwamnatinsa ta aiwatar da tsarin bai wa kananan hukumomi cikakken ‘yancin tafiyar da harkokin kudinsu.

Gayyatar da aka yi wa Gwamnan domin ya kasance daya daga cikin masu tattaunawa a taron, ta zo ne sakamakon amincewa da manufofinsa na gina jihar Katsina mai dorewa domin samun makoma mai haske.

Taron ya samu halartar Ministan Kudi kuma Ministan da ke kula da harkokin tattalin arziki, Ministan Masana’antu, Kasuwanci da Zuba Jari, Mashawarcin Shugaban Kasa na Musamman kan harkokin Makamashi, Mataimakin Gwamnan Babban Bankin Najeriya (CBN) mai kula da kwanciyar hankalin tsarin harkokin kudi, Mista Taiwo Oyedele, wakilin Gwamnan CBN Lamido Yuguda, da kuma Dr. Tayo Aduloju, Shugaba mai kula da harkokin yau da kullum na kungiyar Nigerian Economic Summit Group (NESG).

Ibrahim Kaula Mohammed
Babban Sakataren Yada Labarai na Gwamnan Jihar Katsina

08 ga Oktoba, 2026