Gwamnan Jihar Katsina, Malam Dikko Umaru Radda, ya bayyana cewa kasafin kudin shekarar 2027 zai kunshi kudade domin inganta Cibiyar Horar da ‘Yan Kasuwa a Fannin Noma (Agripreneurship Training Centre) da ke Dutsin-Ma, tare da fadada shirin daukar mahalarta daga mutum daya zuwa mutum uku a kowace mazaba, wanda hakan zai kai ga samun masu horo sama da 1,000.

Gwamnan ya bayyana hakan ne a yau yayin ziyarar aiki da ya kai cibiyar domin duba yadda ake gudanar da horon da kuma tantance bukatun cibiyar.

Gwamna Radda ya ce ziyarar na da nufin tantance ingancin horon da kuma sanin irin tallafin da ake bukata domin karfafa cibiyar. Ya bukaci mahalarta horon su nuna kwazo da jajircewa, inda ya bayyana cewa an tsara shirin ne domin samar da ‘yan kasuwa a fannin noma masu dogaro da kansu, wadanda za su zama masu samar da ayyukan yi ga wasu maimakon masu neman aiki.

Gwamnan ya ba da tabbacin cewa gwamnatin jihar za ta samar da dukkan tallafin da ya dace domin bai wa mahalarta horon damar dogaro da kansu da kuma daga darajar jihar.

Tun da farko, Kwamishinan Aikin Gona, Alhaji Lawal Zakari Shargelle, ya bukaci mahalarta horon su fahimci manufar shirin, yana mai jaddada cewa an zabe su ne domin su kawo sauyi a yankunansu.

Ya umurce su da su canza tunaninsu, su koyi sana’o’i da kwazo, sannan su koma mazabunsu domin horar da wasu da kuma samar da ayyukan yi.

Kwamishinan ya kara da cewa wadanda suka nuna kwazo na musamman za su zama jakadu na gari ga gwamnati a matakin tushe.

An tarbi Gwamnan ne tare da tawagarsa da suka hada da mambobin majalisar zartarwa ta jiha, da Kodinetan Shirin Raya Aikin Gona (ADP), da Shugaban Karamar Hukumar Dutsin-Ma, da Dagacin Makera, da kuma shugabannin hukumomi daban-daban.

Ibrahim Kaula Mohammed
Babban Sakataren Yada Labarai na Gwamnan Jihar Katsina

30 ga Satumba, 2026