Gwamnan Jihar Katsina, Malam Dikko Umaru Radda, ya yaba wa Uwargidan Shugaban Kasa, Sanata Oluremi Tinubu, a matsayin ginshikin kwanciyar hankali, yayin da yake taya ta murnar cika shekaru 66 da haihuwa.

Gwamna Radda ya bayyana Uwargidan Shugaban Kasar a matsayin shugaba mai mutunci da tausayi, wadda shirin nan nata na ‘Renewed Hope Initiative’ (Shirin Sabon Fatan Rayuwa) ya zama babban tallafi na hakika ga ‘yan Najeriya masu rauni, musamman mata, yara, da masu nakasa a fadin kasar, ciki har da Jihar Katsina.

Gwamnan ya yi nuni da cewa, kokarin da Uwargidan Shugaban Kasar ke yi wajen inganta lafiyar mata masu juna biyu, ilimin ‘ya’ya mata, da karfafa mata ta fuskar tattalin arziki ya yi daidai da muhimman manufofin gwamnatinsa a Jihar Katsina, inda ake ci gaba da gudanar da irin wadannan ayyuka don inganta rayuwar mata da yara a kananan hukumomi 34 na jihar.

Haka kuma, ya yaba wa Sanata Oluremi Tinubu bisa goyon bayan da take bai wa shirin Shugaba Bola Ahmed Tinubu na ‘Renewed Hope Agenda’ (Ajandar Sabon Fatan Rayuwa) ba tare da gajiyawa ba, yana mai cewa gudummawar da take bayarwa na ci gaba da karfafa kokarin gwamnatin wajen ciyar da kasa gaba.

A madadin gwamnati da al’ummar Jihar Katsina, Gwamna Radda ya shiga cikin jerin ‘yan uwa, abokai, da masu yi mata fatan alheri a fadin Najeriya wajen taya ta murnar wannan muhimmiyar rana, tare da yi mata fatan samun karin ni’ima, hikima, da kuma koshin lafiya.

Gwamnan ya yi addu’ar Allah Madaukakin Sarki Ya ci gaba da bai wa Uwargidan Shugaban Kasar koshin lafiya, karfi, da kuma karin shekaru masu yawa na ci gaba da yi wa kasa hidima mai amfani.

Ibrahim Kaula Mohammed
Babban Sakataren Yada Labarai na Gwamnan Jihar Katsina

21 ga Satumba, 2026