Uwargidan gwamnan jihar Katsina, Hajiya Zulaihat Dikko Radda, ta ce gwamnatin APC mai ci tun daga sama har zuwa karamar hukuma ta tsaya tsayin daka wajen bunkasa tattalin arzikin mata a fadin kasar nan.

Hajiya Zulaihat Dikko ta bayyana haka ne a lokacin kaddamar da shirin Renewed Hope Initiative na Shugaba Tinubu tare da hadin gwiwar kungiyar Tony Elumelu Foundation for Women Economic Empowerment wanda aka gudanar a dakin taro na Banquet dake gidan gwamnati Katsina.

Uwargidan Gwamnan ta bayyana cewa shirin an yi shi ne don tallafa wa masu kananan sana’o’i, tallafin jari ga mata 500 a fadin Jihohi 36 da kuma babban birnin tarayya Abuja wanda uwargidan shugaban kasa Sanata Oluremi Tinubu ta kaddamar.

Ta bayyana cewa duk wanda ya ci gajiyar tallafin zai samu naira dubu hamsin a matsayin jarin fara kasuwanci domin bunkasa kananan sana’o’in su, inda ta bukace su da su yi amfani da asusun don manufar da aka nufa.

Ta kara da cewa tun farkon gwamnatin Dikko Radda, dubban mata a fadin kananan hukumomin jihar 34 ne suka ci gajiyar shirin koyon sana’o’i daban-daban, kayan fara aiki da jari ta hanyar KASEDA da dai sauransu.

Hajiya Zulaihat Radda ta bayyana fatanta na ganin cewa ba a auna karfin al’umma na gaskiya da dukiyar ‘yan tsiraru ba, sai da walwala da damar da kowa ke da shi.

Uwargidan Gwamnan ta ce kananan sana’o’i su ne kashin bayan tattalin arzikin kasa, ganin yadda suke kula da gidaje, kula da tarbiyyar ’ya’yan talakawa da marasa galihu, da samar da ayyuka, da samar da ayyukan yi a yayin da suke fafutukar samun jarin da ake bukata don bunkasa, gasa, da jure wa tattalin arziki.

A wata tattaunawa da suka yi da wasu zababbun wadanda suka ci gajiyar tallafin, sun bayyana jin dadinsu ga uwargidan shugaban kasa, Sanata Oluremi Tinubu da Hajiya Zulaihat Radda bisa wannan karimcin tare da yin alkawarin yin amfani da asusun cikin adalci wajen bunkasa kananan sana’o’insu.