Aminu Musa Bukar
Kwamishinan ma’aikatar yada labarai da al’adu, Dakta Bala Salisu Zango, ya ce gwamnatin jihar ta dukufa wajen inganta ayyukan gidan rediyon jihar Katsina domin zama abin koyi a tsakanin kafafen yada labarai na jihar.
Kwamishinan ya bayyana hakan ne a yayin wani taron korar ma’aikatan gidan rediyon jihar Katsina guda goma da suka yi ritaya a dakin taro na gidan rediyon.
Kwamishinan wanda ya samu wakilcin Daraktan yada labarai a ma’aikatar, Kwamared Tukur Hassan Dan-Ali ya bayyana cewa gwamnatin jihar mai ci a karkashin Gwamna Dikko Umar Radda, tana ci gaba da alfahari da gidajen rediyo da talabijin na jihar wajen yada labarai ga al’ummar jihar. jihar
A nasa jawabin shugaban hukumar gidan rediyo da talbijin ta jihar Katsina Alhaji Ahmed Abdulkadir ya yabawa ma’aikatan da suka yi ritaya bisa kwazonsu da sadaukar da kai da kuma gudunmawar da suke bayarwa wajen ci gaban gidan rediyon.
Tun da farko Babban Manajan gidan rediyon jihar Katsina, Alhaji Lawal Attahiru Bakori, ya jaddada muhimmancin shirya irin wannan taron, a cewarsa, yana taimakawa wajen inganta tarbiya ta yadda ma’aikata za su kara kaimi.
A madadin Ma’aikatan Gidan Rediyon Malam Hassan Bako wanda ya yabawa Hukumar Gidan Rediyon bisa shirya taron, ya kuma bukaci ma’aikatan gidan rediyon da su dukufa wajen gudanar da ayyukansu na ci gaban gidan rediyon da jihar Katsina baki daya.
Babban abin da ya fi daukar hankali a taron ya hada da gabatar da takardar shaidar kwazo ga ma’aikatan gidan rediyon jihar su goma da suka yi ritaya daga watan Janairu zuwa yau.
Abdul Ola, Katsina
