Gwamnan jihar Katsina, Malam Dikko Radda, da sanyin safiyar Laraba ya kai ziyarar jajantawa da jajanta wa wadanda ambaliyar ruwa ta shafa a baya-bayan nan a Maiduguri, babban birnin jihar Borno.

A yayin ziyarar, Gwamna Radda ya mika wa takwaransa na jihar Borno, Farfesa Babagana Umara Zulum cakin kudi naira miliyan 100, a matsayin tallafi daga mutanen Katsina ga wadanda ambaliyar ruwa ta shafa.

Da yake jawabi ga Gwamna Zulum da sauran manyan baki da suka halarci taron, Gwamna Radda ya ce, “Mun zo nan ne domin jajanta muku da al’ummar jihar Borno bisa bala’in ambaliyar ruwan da ta yi illa ga harkokin zamantakewa da tattalin arziki a jihar.”

Ya kuma kara jaddada muhimmancin lamarin, inda ya ce, “Wannan na daya daga cikin manyan bala’o’in da suka addabi kasarmu, musamman Borno.

“Muna fatan Allah Ta’ala ya kawo mana dauki, muna kuma rokon kada mu sake ganin irin wannan lamari a wani yanki na kasarmu.”

Da yake mayar da martani ga ziyarar hadin kai da bayar da gudummawar, Gwamnan Jihar Borno ya nuna matukar godiya ga Gwamna Radda, da daukacin al’ummar Jihar Katsina bisa wannan gudummawar.

“Wannan aikin alheri a lokacin da muke bukata ya misalta hadin kai da ‘yan uwantakar da ke tsakanin ‘yan Najeriya, goyon bayan ku zai taimaka matuka wajen farfado da ayyukanmu da kuma kawo dauki ga wadanda ambaliyar ruwa ta shafa,” in ji Gwamna Zulum.

Gwamna Radda ya samu rakiyar manyan tawaga ciki har da sarki. Na Daura Mai Martaba Alhaji Umar Faruq Umar, Kakakin Majalisar Dokokin Jihar Katsina Rt. Hon. Nasir Yahaya Daura; Shugaban ma’aikatan Gwamnan, Alhaji Abdullahi Jabiru Tsauri; da sauransu.

Babban Sakataren Yada Labarai na Gwamna Radda,  Ibrahim Mohammed, a wata sanarwa da ya fitar, ya ce ziyarar ta nuna irin hadin kai a tsakanin jihohin Najeriya a lokutan rikici da kuma kudirin gwamnatin jihar Katsina na tallafawa ‘yan Najeriya da ke cikin mawuyacin hali.