A cewar shugaban karamar hukumar Safana Abdullahi, an yi garkuwa da mutane 22, inda wasu suka yi nasarar tserewa.

Abdullahi ya kuma kara da cewa “DPO Safana ya aike da tawagarsa tare da sojoji zuwa yankin kuma tuni suka fara aikin ceto.”

‘Yan ta’addan ne sanye da hijabi da aka fi sani da abaya, sun kai hari a kauyen Runka da ke karamar hukumar Safana ta Jihar Katsina, inda suka yi awon gaba da mutane kusan 25, musamman mata da kananan yara.

Al’ummar dai na nan ne a kusa da dajin Rugu da aka dade da zama maboyar ‘yan ta’adda.

Wata majiya daga al’ummar da ta zanta da gidan talabijin na Channels ta ce maharan dauke da bindigogi sun mamaye yankin ne da misalin karfe 10 na daren ranar Asabar, inda suka rika harbe-harbe ba kakkautawa a cikin al’umma.

Majiyar ta ce ba a samu asarar rai ba a tsakanin al’ummar yankin, sai dai mutum daya da ya samu raunuka yayin da yake kokarin tserewa kuma tuni aka kwantar da shi a asibiti.

A yayin farmakin, ‘yan ta’addan sun rika harbe-harbe a kai-a kai tare da shiga cikin gidaje cikin tsari, suna karbe mazauna garin da kuma yin awon gaba da dukiyoyi.

Abin mamaki sai aka ji wani dan bindiga yana magana ta wayar tarho da wani wanda ba a san ko wanene ba, yana mai cewa, “Yau mun zo garinku”.

“Babu jami’an tsaro a yayin harin wanda ya dauki tsawon sa’o’i ana kai harin, sai bayan faruwar lamarin inda aka tura wani jami’an tsaro dauke da makamai tare da wasu jami’an ‘yan sanda domin sintiri a yankin.

A halin da ake ciki, har zuwa lokacin gabatar da wannan rahoto, hukumomin ‘yan sanda a jihar Katsina ba su fitar da wata sanarwa kan lamarin ba.