Gwamnatin jihar Kwara ta ce za ta baiwa Fulani makiyaya fifiko kan ilimin yara domin su zama shugabanni nagari da kuma kawo karshen rashin tsaro a jihar.

Gwamna AbdulRahman AbdulRazaq
Ya bayyana hakan ne a taron tsaro da kungiyar Miyetti Allah Cattle Breeders Association (MACBAN) ta shirya wa makiyaya, hukumomin tsaro da sauran masu ruwa da tsaki a fadin kananan hukumomin jihar 16 da aka gudanar a Ilorin.

Gwamna AbdulRazaq wanda ya samu wakilcin mai ba shi shawara na musamman kan dabarun, Abdulsalam Atiku ya ce tarbiyar da yaran Fulani zai hana su shiga kungiyar mara kyau.

Ya ce yaki da rashin tsaro yana bukatar a samar da ingantaccen tsari ta hanyar amfani da ilimi domin fadakar da al’umma illolin da ke tattare da aikata miyagun laifuka.

Gwamna AbdulRazaq ya ce ya kamata a kuma wayar da kan Fulanin kan bukatar su bi tsarin kiwon shanu na zamani sabanin yadda ake yawo na kawo karshen rikicin makiyayan manoma.

Ya ce gwamnatin jihar ta kawo dauki da yawa ga makiyaya a fadin kananan hukumomi 16 na jihar domin tallafawa sana’o’insu.

Ya shawarci shugabannin Fulani da su sabunta alkawuran su na tabbatar da tsaro tare da tabbatar da kyautata jin dadin jama’arsu.

A nata jawabin babbar mataimakiya ta musamman ga gwamnan jihar Kwara kan harkokin makiyaya da kuma wayar da kan al’umma, Hajiya Aishatu Yusuf Baruten ta ce gwamnatin jihar ta dukufa wajen tabbatar da tsaro a lungu da sako na jihar.

Ta kuma bukaci mazauna yankin Fulani da su marawa kokarin gwamnatin jihar baya wajen tabbatar da doka da oda.

A jawabinsa ‘yan majalisar wakilai masu wakiltar mazabar Bani/Adena a majalisar dokokin jihar Kwara, Saidu Baba ya ce ya kamata a magance matsalar rashin tsaro da dukkan karfin da ya kamata.

Dan majalisar ya ce kalubalen ‘yan fashi da garkuwa da mutane da satar shanu ya zama ruwan dare ga jihar da ma kasa baki daya.

Ya ce ‘yan majalisar dokokin jihar za su ci gaba da samar da dokokin da za su rage kalubalen tsaro zuwa mafi kankanta.

Dan majalisar ya bukaci hadin kan masu ruwa da tsaki domin ganin cewa kalubalen tsaro ya zama tarihi.

A nasa bangaren shugaban kungiyar Miyetti Allah Cattle Breeders Association of Nigeria (MACBAN) reshen jihar Kwara, Alhaji Shehu Garba ya ce matsalar rashin tsaro ya sa rayuwar Fulani ta kasa jurewa.

Ya shawarci Fulani makiyaya da su goyi bayan kokarin gwamnati da nufin kawo karshen kalubalen tsaro da ke addabar su.

Alhaji Garba ya ce idan ba a ba da kulawar da ya kamata ba na iya haifar da durkushewar kiwo a jihar da ma kasa baki daya.

A nasa jawabin Hardon Hardodi (Shugaban Fulani) a jihar Kwara, Alhaji Ojonla Mahmud, wanda Ali Muhammed Jowuro ya wakilta ya ce Fulani makiyaya za su tabbatar da goyon bayan da ya dace ga ayyukan gwamnati na kawo karshen rashin tsaro a dukkan matakai.

Ya shawarci makiyayan da su tabbatar da taka tsan-tsan tare da kai rahoto ga jami’an tsaro domin daukar matakin gaggawa.

Tun da farko a jawabinsa na maraba, sakataren kungiyar Miyetti Allah Cattle Breeders Association of Nigeria (MACBAN) reshen jihar Kwara, Abdulazeez Mohammed ya ce taron na da nufin su fito da bakinsu kan kalubalen tsaro a jihar musamman a jihar Kwara ta kudu.

Ya ce a kullum ana garkuwa da makiyayan tare da kwace musu hanyar rayuwa.

Sakataren MACBAN ya ce matsalar tsaro ta sa Fulani suka yi watsi da al’umma saboda tsoron a kashe su.

Abdulazeez ya ce ana kallon Fulani makiyaya a matsayin masu tayar da kayar baya kuma suna fuskantar tsangwama a cikin al’umma wanda hakan ke sa rayuwa ta kasa jurewa.

Ya ce lamarin yana da ban tausayi, kuma kungiyar ta rubuta wa wadanda suka tashi komawa gida, inda ya kara da cewa an yi shiri don tabbatar da tsaron rayuka da dukiyoyi a jihar.

Sakataren MACBAN ya yi kira ga masu ruwa da tsaki da su goyi bayan kokarin gwamnati na tabbatar da zaman lafiya da tsaro a al’ummomin da abin ya shafa a fadin jihar .