Maiwada Danmallam, Darakta Janar na yada labarai da sadarwa na Gwamna Dikko Umaru Radda, ya tabbatar wa manema labarai a ranar Larabar da ta gabata cewa kwamandojin ‘yan bindiga a kewayen Batsari sun mika wuya ga sojoji bisa radin kansu sakamakon wani shirin zaman lafiya da wata kungiya ta yi a Katsina.

Kungiyar ta ce shugabannin ‘yan bindiga da kansu ne suka fara tattaunawar kuma sun amince su daina kai hare-hare.

Kungiyar ta bayyana cewa wasu daga cikin ‘yan fashin sun dage da rike makamansu domin kare kansu daga bangaren da suka ki amincewa da yarjejeniyar zaman lafiya.

Shugaban kungiyar Hamisu Sa’idu Batsari ya tabbatar wa manema labarai faruwar lamarin. Ya bayyana fitattun mutane daga cikin wadanda suka mika wuya kamar su Abu Radda, Maikada, Umar Blak, da Tukur Dannajeriya, tare da mabiyansu.

Ya bayyana cewa, “Kowane daga cikin wadannan kwamandojin, musamman Abu Radda, ana kyautata zaton yana da mayaka har 500 a karkashinsa,” wasu da suka hada da Tukur Mairakumi, Maikada, da Tukur Dannajeriya, suna rike da mayaka tsakanin 200 zuwa 300 kowanne.

Wasu daga cikin ‘yan ta’addan da aka ruwaito sun dage kan cewa su ajiye makamansu, sun bayyana bukatar kare kansu da dabbobinsu daga bangarorin da ke adawa da yarjejeniyar zaman lafiya.

Batsari ya bayyana kyakkyawan fata game da sakamakon, inda ya ce sabanin kokarin da aka yi a baya—inda hukumomi suka bi ‘yan bindigar tare da yin alkawuran da ba su cika ba—a wannan karon, shirin ya fito ne daga hannun ‘yan fashin da kansu.

A wani bangare na yarjejeniyar, ‘yan fashin sun yi alkawarin kawo karshen duk wani tashin hankali da kuma sakin duk wadanda aka kama, ciki har da wadanda ke wajen yankin.

Hakazalika, barayin sun bukaci gwamnati da ta tabbatar da adalci a tsakanin su da mazauna yankin, gami da inganta hanyoyin samar da ababen more rayuwa kamar ruwa mai tsafta da ilimi.

“Sun kuma bukaci a kawo karshen kamawa da kashe-kashen da jami’an tsaro ke yi ba bisa ka’ida ba,” in ji Batsari. “Idan daya daga cikinsu ya aikata laifi, yana so a gurfanar da shi a gaban kotu kuma a hukunta shi kamar yadda doka ta tanada.”

Maiwada Danmallam, Darakta Janar na yada labarai da sadarwa na Gwamna Dikko Umaru Radda ya tabbatar da faruwar lamarin.

Maiwada a nasa maganar ya ce “Zan iya tabbatar da kwamandojin ‘yan bindiga a kusa da Batsari sun mika wuya ga sojoji bisa radin kansu,” ya kuma kara da cewa, “A matsayin mu na gwamnati a fili yake – Mai girma Gwamna Radda manufarsa ta ‘kada a yi sulhu da ‘yan ta’adda’ har yanzu tana nan.”