Hukumar HISBA reshen jihar Katsina ta shirya taron wayar da kan malamai daga dukkan bangarorin addinin musulunci na kananan hukumomi 34 na jihar Katsina na kwana daya.

Taron wanda aka gudanar a ranar Asabar, da nufin samar da hadin kai, zurfafa fahimtar juna, da karfafa hadin gwiwa tsakanin malaman Musulunci da kwamandojin HISBA a fadin jihar.

Da yake jawabi a wajen taron, Babban Kwamandan Hukumar HISBA ta Jiha, Sheikh Dr. Aminu Usman Abu Amar, ya ce an shirya taron ne domin tattaunawa kan yadda za a kafa da gudanar da ayyukan hukumar a jihar Katsina.

Ya jaddada bukatar hadin kai a tsakanin masu ruwa da tsaki tare da yin kira da a ba da shawarwari da gudumawa daga Malamai don inganta aiwatar da shirye-shirye da ayyukan hukumar.

Dokta Abu Amar ya kuma bayyana cewa taron bitar ya samar da wani dandali ga kwamandojin HISBA na kowace karamar hukuma 34 domin bayyana ra’ayoyinsu da gogewa kan yadda ake gudanar da ayyukansu a matakin farko.

Ya yaba da irin kokari da kwazo da kwamandojin yankin suke yi, inda ya yaba da gagarumar gudunmawar da suke bayarwa wajen bunkasa da ingancin ayyukan HISBA a fadin jihar nan.

A nasa jawabin mai baiwa hukumar HISBA ta jihar Katsina shawara kan harkokin shari’a Barista Jabir Bello ya gabatar da makala da ta bayyana irin hakin da hukumar ke da shi na shari’a da da’a.

Ya jaddada kudirin hukumar na inganta adalci, da’a, da kuma kimar jin kai a cikin al’umma.

An kammala taron bitar tare da halartar kwamandojin yankin, wadanda suka bayar da shawarwari masu mahimmanci da nufin inganta ayyukan hukumar baki daya.

Taron ya nuna wani gagarumin mataki na samar da hadin gwiwa tsakanin malaman addini da hukumar HISBA domin ci gaban jihar Katsina.