Gwamnatin jihar Katsina ta kudiri aniyar gina sabon filin wasa a karamar hukumar Danja da ke jihar domin bunkasa wasanni tun daga tushe.

Kwamishinan wasanni na jihar Aliyu Lawal Zakari Shargalle ne ya bayyana hakan a yayin bikin mika filayen da karamar hukumar Danja ta bayar.

Kwamishinan ya yaba da tunanin da shugaban karamar hukumar ya yi na samar da wani bangare na filin gina wuraren wasanni na yankin.

Aliyu Lawal Shargalle ya jaddada kudirin gwamnatin jihar na samar da ingantaccen wurin da zai dauki nauyin wasannin guje-guje da tsalle-tsalle da sauran wasannin motsa jiki domin ci gaban matasa a yankin.

Ya bukaci masu sha’awar wasanni a yankin da su mayar da martani ta hanyar amfani da filin wasanni da aka tanada.

Hakazalika, kwamishinan wasanni na jihar Katsina, Aliyu Lawal Zakari Shargalle, ya haramta duk wani aikin noma a filin wasa na Isma’ila Isah Funtua.

A yayin ziyarar wayar da kan ‘yan majalisar wasanni na shiyyar Funtua da Malumfashi Aliyu Lawal Zakari Shargalle ya bada umarnin.

Kwamishinan ya kara da cewa, ana bayar da umarnin dakatar da duk wasu ayyuka tare da baiwa matasa da ke tururuwa a shiyyar damar shiga wuraren ba tare da wata matsala ba.

Shargalle ya bayyana cewa gwamnati mai ci a yanzu ta kuduri aniyar kammala inganta filin wasan domin amfanin dukkan harkokin wasanni.

A yayin da a Malumfashi da Bakori kwamishinan ya zagaya sassa daban-daban na babban filin wasa na Abubakar Labo Controller da na Garin Bakori domin duba halin da wurin ke ciki da sanin yadda za a gyara su.

Ya tabbatar da cewa za a sake gina rumfar da ke filin wasan a inda ya dace, kuma za a gyara katangar katangar yadda ake bukata.