A ci gaba da kokarin sake farfado da fannin kiwon lafiya a jihar, gwamnan jihar Katsina, Malam Dikko Umaru Radda ya bayyana cewa gwamnatin jihar ta zuba naira biliyan uku da miliyan dari bakwai da saba’in da bakwai (N3.77bn) a fannin kiwon lafiyar jihar daga watan Yuni. 2023 zuwa Afrilu 2024.

Gwamna Radda ya bayyana hakan ne a jawabinsa a lokacin kaddamar da sabuwar cibiyar sikila tare da raba magungunan sikila da zazzabin cizon sauro kyauta a babban asibitin Katsina a ranar Litinin.

Kungiyar mai zaman kanta ta uwargidan gwamnan, “Safe Space Humanitarian Initiative (SASHIN) ce ta shirya taron.”

Gwamna Radda ya fayyace cewa an ware wani bangare na kudaden ne ga daliban da suka fito daga jihar Katsina da kuma wadanda ke shirin zama a kasar waje.

Ya kara da cewa, an yi amfani da wani bangare na asusun ne domin inganta cibiyoyin kiwon lafiya a matakin farko (PHCs) guda 102 a jihar kuma ana shirin kara inganta wasu 34 zuwa manyan asibitoci a karshen shekara.

Ya bayyana cewa an yi amfani da naira miliyan dari da goma sha biyu (N112,000,000) wajen bayar da alawus alawus ga daliban likitanci 542 da ke karatu a cikin Najeriya da kuma kasashen waje. Gwamnan ya jaddada cewa an kara yawan kudaden kula da lafiya da kashi dari takwas.

Malam Radda ya tunatar da ma’auratan da ke shirin aure da su yi gwajin lafiya don hana haihuwar ‘ya’ya masu ciwon sikila. Ya yabawa shirin uwargidan shugaban kasa na samar da magunguna kyauta ga yara masu fama da cutar sikila da zazzabin cizon sauro. Hakan ya ce zai inganta kokarin gwamnatin jihar na inganta harkar kiwon lafiya ga ‘yan kasa.

Tun da farko, Hajiya Zulaihat Dikko Radda, wadda ita ce wadda ta fara SASHIN kuma uwargidan Gwamnan Jihar Katsina, ta bayyana cewa cibiyar ba kawai za ta raba magunguna a kai a kai ba, har ma za ta tabbatar da samar da lafiya cikin gaggawa a jihar.

Ta kara da cewa kungiyar tata ta yi rijistar yara da mata dubu tara masu fama da cutar sikila a jihar tare da shirin kara yin rijistar shiga shirin a shiyyar sanatoci uku.

Alhaji Musa Adamu Funtua kwamishinan lafiya na jihar ya jaddada cewa fannin kiwon lafiya shine babban abin da gwamnatin Dikko Radda ke jagoranta. Ya yi nuni da cewa kafa cibiyar sikila ya nuna karara na kudirin Gwamna na tallafawa masu fama da cutar.

A madadin Mai Martaba Sarkin Katsina Alhaji Lawal Idris Bagiwa, Sarkin Fulani Hamsheta ya bayyana godiyarsa ga gwamnan jihar bisa kokarin da yake yi na inganta rayuwar al’umma ta hanyoyi daban-daban.