Gwamnan Jihar Katsina, Malam Dikko Umaru Radda, ya bai wa al’ummar Mai’adua tabbacin cewa gwamnatinsa ba za ta daina kawo ci gaba a karamar hukumar ba bayan zabe.
Gwamna Radda ya bayar da wannan tabbacin ne a Mai’adua, inda dubban mazauna yankin, musamman mata da matasa, suka fito domin nuna goyon bayansu ga jam’iyyar Tinubu-Dikko-Radda ta shekarar 2027.
Ya gode wa al’ummar yankin bisa fitowar su, inda ya ce hakan yana nuna amincewarsu da gwamnatinsa.
“Idan aka kalli wannan taro mai dimbin yawa, musamman mata da matasanmu, muna da dalilai masu karfi na gode wa mutanen Mai’adua. Kun nuna goyon bayanku ta hanyar kasancewarku a nan,” in ji shi.
Gwamna Radda ya bayyana cewa al’ummar Mai’adua sun karbi ayyukan gwamnatinsa a fannonin kiwon lafiya, ilimi, daukar malamai aiki, da kuma shirye-shiryen karfafa mata da matasa.
“Mutanen Mai’adua sun amince da asibitoci, makarantu, malamai da muka dauka aiki, da kuma shirye-shiryen karfafa mata da matasanmu. Wadannan abubuwa ne masu muhimmanci wajen inganta rayuwa,” in ji shi.
Ya sake jaddada kudirinsa na ci gaba da kawo ci gaba a yankin, tare da samar da karin shirye-shirye da ayyuka domin inganta jin dadin jama’a.
“Ba za mu daina kawo ci gaba a Mai’adua ba. Bayan zabe, za mu dawo domin gode muku, kuma za mu ci gaba da tallafawa ci gaban Mai’adua ta hanyar shirye-shirye masu amfani,” in ji shi.
Haka kuma, Gwamnan ya jinjina wa marigayi tsohon Shugaban Kasa Muhammadu Buhari, inda ya bayyana shi a matsayin shugaba mai mutunci, uba, kuma jagora. Ya yi addu’ar Allah Ya gafarta masa kuma Ya ba shi hutu na har abada.
A yayin taron, Gwamna Radda ya karbi dubban mambobin jam’iyyun adawa wadanda suka sauya sheka zuwa jam’iyyar APC. Ya ce matakin da suka dauka yana nuna amincewarsu ga shugabanci da tsarin jam’iyyar.
“A yau, muna karbar dubban sabbin mambobi. Sun shiga jam’iyyar da ke da tsari da kuma makoma mai kyau. Muna maraba da su,” in ji shi.
Ya kara da cewa sabbin mambobin sun fito ne daga sassan zabe daban-daban a Mai’adua, kuma kasancewarsu za ta karfafa jam’iyyar a matakin tushe.
Taron ya samu halartar Mataimakin Gwamna, Malam Faruk Lawal; Kakakin Majalisar kuma Dan Takarar Majalisar Dattawa na shiyyar Daura, Rt. Hon. Nasir Yahaya Daura; Darakta-Janar na Majalisar Kamfen, Arch. Ahmed Musa Dangiwa; Shugaban kwamitin, Sanata Hadi Sirika da Dr. Mustapha M. Inuwa; Shugaban Jam’iyyar APC na Jihar Dr. Bashir Gambo Saulawa, Mataimakin Darakta Janar, Hon. Abdulkadir Mamman Nasir; Babban Sakatare, Hon. Abdullahi Aliyu Turaji, sarakunan gargajiya, jami’an jam’iyyar da sauran masu ruwa da tsaki.
Ibrahim Kaula Mohammed
Babban Sakataren Yada Labarai na Gwamnan Jihar Katsina
17 Nuwamba 2026






















