Rundunar ‘yan sandan jihar Katsina ta kama wani da ake zargi da zama fitaccen mai safarar miyagun kwayoyi, inda ta kwace kwayoyin Pregabalin guda dubu goma sha biyar (15,000) da aka boye su cikin dabara.

A cewar kakakin rundunar, DSP Abubakar Aliyu, a ranar 17 ga watan Oktoba, 2026, da misalin karfe 5:30 na yamma, an samu sahihan bayanai a ofishin ‘yan sanda na Kasuwar Central da ke Katsina, game da wani mutum da ake zargi wanda ke dauke da tarin miyagun kwayoyi.

Aliyu ya kara da cewa, “Nan take, bisa la’akari da bayanan da aka samu, da misalin karfe 6:30 na yamma a ranar, jami’an ‘yan sanda na ofishin sun tare kuma sun kama wani mutum mai suna Junaidu Rabi’u, mai shekaru 45.

“Bayan an bincike shi, an same shi da kwayoyin Pregabalin guda dubu goma sha biyar (15,000), wadanda suka yi daidai da fakiti dubu daya (1,000).

“A yayin gudanar da binciken farko, wanda ake zargin ya amsa laifinsa, inda ya bayyana cewa wani mutum mai suna Nafi’u (wanda a yanzu yake gudu) ne ya ba shi aikin karba da kuma kai kayan a madadin sa.

“Ana ci gaba da kokarin gano inda abokin laifin yake domin kama shi. Za a gurfanar da wanda ake zargin a gaban kotu da zarar an kammala bincike.”

Kwamishinan ‘yan sandan jihar, Ali Umar Fage, yayin da yake yaba wa jami’an bisa gaggawa da kuma kwarewar da suka nuna wajen gudanar da aikin, ya sake jaddada kudurin rundunar na ci gaba da yaki da dukkan nau’ikan laifuka a jihar.

Haka kuma, Kwamishinan ya yaba wa al’ummar jihar Katsina bisa goyon bayan da suke ci gaba da bayarwa, da kuma samar da muhimman bayanai ga ‘yan sanda.