…..Yayin da Hukumar ke Neman Inganta Karfin Tsarin Aikinta don Kyautata Ayyuka

Gwamnan Jihar Katsina, Malam Dikko Umaru Radda, ya yi alkawarin bayar da sabon tallafi domin karfafa tsari da ayyukan Hukumar Hisbah ta Jihar Katsina, tare da inganta yadda take gudanar da ayyukanta na tabbatar da zaman lafiya da kuma magance matsalolin zamantakewa a fadin jihar.

Gwamna Radda ya bayyana hakan ne a jiya yayin da ya gudanar da taron sirri tare da shugabannin Hukumar Hisbah, karkashin jagorancin Shugabanta, Birgediya Janar Ahmad Muhammad Daku (mai ritaya), a Gidan Gwamnati da ke Katsina.

Bisa sakamakon taron, Gwamna Radda ya bayyana cewa gwamnatinsa za ta ci gaba da tallafawa hukumomin da ke da alhakin tabbatar da zaman lafiya, kare lafiyar al’umma, da kuma magance matsalolin zamantakewa.

Ya tabbatar wa Hukumar Hisbah cewa gwamnatinsa a shirye take ta taimaka mata wajen gudanar da ayyukanta yadda ya kamata, sannan ya umurci shugabannin hukumar da su rubuta bukatunsu a hukumance domin a duba su tare da ba da amincewar da ta dace.

Haka kuma, Gwamna Radda ya bayyana shiryinsa na tallafawa kafa cibiyar gyaran hali da horarwa a karkashin Hukumar Hisbah, domin karfafa ayyukan gyaran hali da kuma matakan da suka shafi al’umma kai tsaye.

Ya kuma yi alkawarin tallafawa samar da ofisoshi na dindindin ga Hukumar Hisbah a dukkan kananan hukumomi 34 na jihar, tare da samar da motocin aiki da sauran kayan sufuri domin bai wa ma’aikatanta damar gudanar da ayyukansu yadda ya kamata.

Tun da farko, Daraktan Gudanarwa da Samar da Kayayyaki na Hukumar Hisbah ta Jihar Katsina, Bello Gatari Barau Zakka, ya gabatar wa Gwamna Radda rahoton halin da hukumar ke ciki.

Ya bayyana cewa taron ya bai wa shugabannin hukumar damar yi wa Gwamna Radda bayani kan manyan kalubalen da ke shafar ayyukansu tare da neman sa hannunsa wajen magance su.

A cewarsa, hukumar ta neman a shirya taron karawa juna sani na musamman (retreat) ga mambobinta domin zurfafa fahimtarsu game da nauyin da ya rataya a kansu, karfafa hadin gwiwa, da kuma inganta yadda suke gudanar da ayyukansu.

Ya ce Gwamna Radda ya amince da bukatun tare da bayar da umarnin a rubuta su a hukumance domin a duba su tare da ba da amincewa. Bello Gatari Barau Zakka ya bayyana cewa, taron bitar da aka tsara zai bai wa mambobin hukumar damar fahimtar nauyin da ya rataya a kansu sosai tare da inganta yadda suke gudanar da ayyukansu, yayin da cibiyar gyaran halayen da aka shirya kafawa za ta karfafa karfin hukumar wajen tallafawa ayyukan gyaran halaye.

Har ila yau, ya yaba da kudirin Gwamna na samar da ofisoshi na dindindin da motocin aiki, inda ya bayyana wadannan abubuwa a matsayin muhimman matakai na inganta ayyukan hukumar a fadin jihar.

Wakilan Hukumar Yaki da Safarar Miyagun Kwayoyi ta Kasa (NDLEA), Hukumar Kula da Shige da Fice ta Najeriya, Hukumar Kashe Gobara ta Tarayya, Rundunar ‘Yan Sandan Najeriya, da Hukumar Kula da Tsaron Hanya ta Tarayya (FRSC), tare da mambobin hukumar Hisbah, sun halarci taron.

Ibrahim Kaula Mohammed

Babban Sakataren Yada Labarai na Gwamnan Jihar Katsina

7 ga Oktoba, 2026