Matasan jam’iyyar All Progressives Congress (APC) a fadin jihar Katsina sun sake jaddada goyon bayansu tare da nuna amincewarsu ga takarar hadin gwiwa ta Tinubu da Dikko domin wa’adi na biyu a shekarar 2027.

An bayyana wannan goyon baya ne a wani babban taron matasa da Ofishin Babban Mataimaki na Musamman ga Gwamna kan Kafofin Watsa Labarai na Zamani (Yankin Katsina), Hon. Sani Abubakar Dan Abba, ya shirya a cibiyar Continental Events Center da ke Katsina a ranar Litinin.

Gwamna Dikko Umaru Radda, wanda Kwamishinan Albarkatun Ruwa, Hon. Mannir Ayuba Sullubawa ya wakilta, ya gode wa matasan bisa goyon bayansu mara yankewa, inda ya bayyana Shugaba Bola Ahmed Tinubu da Gwamna Radda a matsayin shugabanni da suka cancanci ci gaba da jagoranci saboda ayyukan raya kasa da samar da ababen more rayuwa da suka gudanar a sassa daban-daban.

Ya yi nuni da cewa gwamnatin Radda ta dauki matakin nada matasa da dama a mukaman siyasa a matsayin wani bangare na tsarin shigar da matasa cikin harkokin mulki.

A jawabinsa na maraba, Hon. Sani Abubakar Dan Abba ya bayyana cewa an shirya taron ne domin wayar da kan matasa game da manufofi, shirye-shirye, da nasarorin da gwamnatocin Tinubu da Radda suka samu, tare da karfafa musu gwiwa wajen bayar da gudummawa mai ma’ana ga ci gaban kasa.

Ya ce gwamnatin APC, tun daga matakin kasa har zuwa jiha da kananan hukumomi, ta taba kowane bangare na rayuwa, ciki har da hanyoyi, asibitoci, shirye-shiryen karfafa tattalin arziki, noma, da tsaro; sannan ya yi kira ga matasa da su kiyaye mutuncinsu tare da guje wa dabi’ar daukar nauyin tashin hankali a siyasa ko cin zarafi a kafofin sada zumunta.

Shugaban taron kuma tsohon Mataimakin Gwamna, Hon. Tukur Ahmad Jikamshi, ya bayyana cewa jam’iyyar APC ta cancanci ci gaba da samun goyon baya a dukkan matakai, la’akari da shirye-shiryen “Renewed Hope” (Sabon Fatan) da Shugaba Tinubu ya kawo, da kuma kokarin Gwamna Radda na “Building Your Future” (Gina Makomarku).

Taron ya kuma kunshi gabatar da bayanai kan muhimman nasarorin da gwamnatin ta samu.

Dr. Mannir Wurma ya yi magana kan batun tsaro da gina hanyoyi; Injiniya Kabir Abdullahi Kofar Sauro ya yi magana kan horar da matasa sana’o’i da fasaha a cibiyar Katsina Youth Craft Village; Dr. Mustapha Muhammad Inuwa ya bukaci matasa su yi aiki tukuru domin ganin Tinubu da Dikko sun yi nasara a zaben 2027; yayin da Babban Mataimaki na Musamman kan Harkokin Dalibai, Hon. Muhammad Nuhu Nagaske ya bayyana matakan da aka dauka a bangaren ilimi, ciki har da fa’idodin da ake samu daga shirin NELFUND.

Gwamna Radda, ta hannun wakilinsa, ya yaba wa matasan bisa biyayyarsu da kuma tsayuwarsu kai-tsaye tare da jam’iyyar APC, sannan ya yi musu fatan samun nasara a dukkan ayyukansu.