Gwamnan Jihar Katsina, Malam Dikko Umaru Radda, ya yi ta’aziyya ga Kodinetan Shirin Ci Gaban Al’umma (CDP), Mataimakin Farfesa Kamaladden Kabir, kan rasuwar uwar Gidansu, Hajia Sa’adatu Kabir.

Hajia Sa’adatu Kabir, mai shekaru 75, ta rasu ranar Talata bayan ta yi fama da rashin lafiya kuma an binne ta a ranar kamar yadda addinin Musulunci ya tanada.

Ta bar ‘ya’ya 10 kuma an bayyana ta a matsayin uwa mai himma wadda ta damu da iyalinta sosai.

Gwamna Radda ya bayyana rasuwarta a matsayin rashi mai zafi, yana mai lura da sadaukarwarta ga iyalinta da wadanda ke kewaye da ita.

“Mun rasa uwa wacce ta shafe rayuwarta tana kula da iyalinta. Rasuwarta abin tausayi ne, amma muna jin dadin rayuwar da ta rayu da kuma iyalan da ta bari,” in ji Gwamnan.

Ya bukaci iyalan da su ci gaba da dagewa cikin imani su kuma yarda da mutuwar a matsayin nufin Allah Madaukakin Sarki.

“A irin wannan lokaci, ina kira ga iyalan da su ci gaba da zama masu ƙarfi. Muna addu’ar Allah Madaukakin Sarki ya yafe mata kurakuranta ya kuma saka mata da alherin da ta aikata,” in ji shi.

Gwamna Radda ya tabbatar wa iyalan goyon baya da addu’o’in Gwamnati da jama’ar Jihar Katsina.

“A madadin Gwamnati da jama’ar Jihar Katsina, ina mika ta’aziyyata ga Mataimakin Farfesa Kamaladden Kabir, yara da dukkan iyalan. Allah Ya ba su ƙarfin jure wannan babban rashi,” ya ƙara da cewa.

Ya yi addu’ar Allah Madaukakin Sarki ya bai wa Hajia Sa’adatu Kabir Aljannatul Firdaus kuma ya ba iyalanta haƙuri da ƙarfin jure rashinta.

Ibrahim Kaula Mohammed

Babban Sakataren Yaɗa Labarai na Gwamnan Jihar Katsina

18 ga Agusta, 2026