Mukaddashin gwamnan jihar Katsina, Malam Faruk Lawal Jobe, ya yi kira da a kara tallafa wa sojoji domin karfafa ayyukan yaki da ‘yan bindiga a jihar.

Mukaddashin gwamnan ya yi wannan roko ne a wata ganawa ta gefe da babban hafsan hafsoshin tsaron kasar, Janar Christopher Musa, a taron kungiyar kula da ‘yan cirani ta duniya (IOM) da aka gudanar jiya a Abuja.

A yayin tattaunawar tasu, Malam Jobe ya jaddada bukatar a kara inganta hadin gwiwa tsakanin jami’an tsaro da gwamnatin jihar Katsina cikin gaggawa, inda ya ce ‘yan fashi na ci gaba da yin barazana ga zaman lafiya da tsaro a yankunan karkara.

Ya kuma jaddada cewa lamarin na bukatar a dauki matakan daidaita kai da kuma hada karfi da karfe tsakanin hukumomin jihar da babban hafsan soji.

Ya kuma kara da cewa, mazauna karkara da dama sun fuskanci kauracewa gidajensu, da asarar rayuwa, da kuma dakile ayyukan noma, sakamakon barazanar ‘yan fashi.

A cewarsa, tabbatar da tsaron lafiyarsu ba wai kawai a dawo da zaman lafiya ba ne, har ma da farfado da zamantakewa da tattalin arzikin jihar.

Mukaddashin Gwamnan ya jaddada cewa gwamnatin sa ta kuduri aniyar yin aiki tukuru tare da duk masu ruwa da tsaki a harkar tsaro har sai an shawo kan matsalar.

“Mutanenmu sun cancanci rayuwa cikin aminci da mutunci, za mu ci gaba da yin aiki kafada da kafada da sojoji da sauran jami’an tsaro har sai an shawo kan wannan matsalar,” in ji Malam Jobe.

Da yake mayar da martani, Janar Musa ya tabbatar wa mukaddashin gwamnan rundunar sojojin Najeriya kwarin gwiwa wajen yaki da ‘yan fashi.

Ya kuma jaddada cewa, maido da tsaro a Katsina da ma fadin kasar nan, abu ne na gaba daya, wanda rundunar soji ke ba da cikakken jari wajen cimma nasara.

Janar Musa, ya kuma kara da cewa rundunar sojojin Najeriya ta kuduri aniyar karfafa ayyukansu a jihar Katsina da sauran yankunan da ake fama da rikici. “Wannan batu ne da muka kuduri aniyar shawo kan lamarin, za mu ci gaba da yin iya kokarinmu har sai an samu kwanciyar hankali.” Inji Janar Musa.

Gwamnatin jihar Katsina na ci gaba da yin cudanya da masu ruwa da tsaki a harkar tsaro a matakin kasa da kasa, a wani bangare na dabarun kiyaye rayuka, da karfafa juriya, da sake farfado da fata ga al’ummomin da rashin tsaro ya fi shafa.

An gudanar da taron ne a gefen taron IOM, wanda kuma ya samu halartar mataimakin gwamnan jihar Borno, Hon Umar Usman Kadafur, ministar harkokin mata, Imaan sulaiman- Ibrahim, da mataimakiyar darakta (ayyuka) na IOM, Ms. Ogechi Daniels, da sauran manyan baki.