Babbar Kotun Jihar Katsina 9, karkashin Mai shari’a I.I. Mashi, ya yanke wa wasu mutane biyu hukuncin kisa bisa laifin kashe tsohon kwamishinan kimiyya da fasaha na jihar, Rabe Nasir, a shekarar 2021.

Kotun ta tabbatar da cewa Shamsu Lawal, tsohon mai gadin marigayin da Tasi’u Rabi’u da ke aikin dafa abinci a gidan marigayin, sun sanya wa Rabe Nasir gubar guba, har ya kai ga mutuwarsa.

Binciken asibiti ya tabbatar da hakan, wanda ya nuna guba a jikin mamacin, da kuma shaidar binciken ‘yan sanda.

Baya ga hukuncin kisa da aka yanke wa mutanen biyu, kotun ta kuma yanke wa wani tsohon mai gadi Sani Sa’adu hukuncin daurin shekaru biyar a gidan yari bisa samunsa da laifin boye gaskiya game da kisan.

A daya hannun kuma, kotun ta wanke wata yarinya mai suna Gift Bako, saboda rashin cikakkun shaidun da ke alakanta ta da aikata laifin.

Lauyanta, Barista Shedrack, ya yi maraba da hukuncin da kotun ta yanke, yana mai cewa ya dogara ne akan gaskiya.

Lauyoyin da suka fito daga kowane bangare sun bayyana gamsuwarsu da yadda ake gudanar da shari’ar da kuma hukuncin da aka yanke.

Lauyan wadanda aka yankewa hukuncin, Barista Ahmad Murtala Kankia, ya roki a yi musu sassauci, yana mai jaddada cewa wadanda aka yankewa hukuncin suna da iyalai da kuma wadanda suka dogara da su.

Lauyan mai gabatar da kara ya bayyana gamsuwarsa da hukuncin, inda ya bayyana cewa ya yi daidai da doka kuma an yi adalci.

Wadanda aka yanke wa hukuncin sun girgiza matuka lokacin da jami’an tsaro suka kai su gidan yari.

An kuma bayyana farin ciki da annashuwa a fuskokin iyalan Gift Bako da lauyoyinta bayan an wanke ta.

Marigayi Rabe Nasir ya taba rike mukamin kwamishinan kimiyya da fasaha a jihar Katsina a zamanin gwamnatin tsohon Gwamna Aminu Masari.

Ya kuma kasance dan majalisar tarayya mai wakiltar kananan hukumomin Mani da Bindawa a shekarar 2003 kuma ya taba yin aiki a matsayin jami’in DSS.

Haka kuma akwai wasu mutane biyu da ke da hannu a shari’ar da suka shigar da kara a wata babbar kotun Kaduna, suna neman a dakatar da shari’ar a Katsina.