“Wadannan ayyukan sun sa dukanmu ƙarfin hali don fuskantar wannan rashi,” in ji dangin.

Iyalan marigayi tsohon shugaban kasa Muhammadu Buhari sun yabawa ‘yan Najeriya da sauran kasashen duniya bisa gagarumin goyon bayan da suka nuna a lokutan zaman makoki da jana’iza.

A wata sanarwa da Malam Garba Shehu ya sanyawa hannu ga iyalan ta hannun Malam Mamman Daura, babban jigo a gidan Buhari ya ce, sun mika godiya ta musamman ga shugaban kasa Bola Tinubu da matarsa, Sanata Remi Tinubu bisa irin rawar da suka taka kafin rasuwar tsohon shugaban kasar da kuma bayan rasuwarsa.

Iyalan sun ce ” ziyarce-ziyarcen, sakwannin da kuma yanke shawarar ayyana hutun jama’a tare da canza sunan Jami’ar Maiduguri bayan Buhari wasu abubuwa ne masu sanyaya zuciya,” in ji dangin.

Mataimakin shugaban kasa Kashim Shettima, wanda ya yi tattaki zuwa kasar Ingila, daga bisani kuma ya ziyarci Daura tare da ministoci a lokacin zaman makoki, shi ma an yi ta yabo.

Hakazalika an mika godiya ga shugabannin duniya, ciki har da Sarki Charles III na Birtaniya, Sakatare-Janar na Majalisar Dinkin Duniya, António Guterres; Mataimakiyar Sakatare-Janar, Amina Mohammed; Shugaban kungiyar Tarayyar Afirka, da shugabannin ECOWAS, don jajensu, wasiku, da ziyarce-ziyarce ko kuma kiransu.

Bugu da kari, ‘yan uwa sun amince da ziyarce-ziyarce da sakonnin shugabannin Najeriya na yanzu da na tsoffin shugabannin kasar, ciki har da tsohon shugaban kasa, Janar Abdulsalami Abubakar; Tsohon Mataimakin Shugaban Kasa, Atiku Abubakar, Namadi Sambo, Yemi Osinbajo, da Ambasada Babagana Kingibe.

Gwamnonin jihohi daban-daban, musamman mai masaukin baki, gwamnan jihar Katsina, Dakta Dikko Umar Radda, da kuma Borno, Farfesa Babagana Umara Zulum, da tsohon gwamnan jihar Anambra, Dakta Peter Obi, sun samu karbuwa saboda nuna juyayi.

Sanarwar ta kuma yaba da kasancewar da kuma goyon bayan shugabannin majalisar dokokin kasar, ciki har da shugaban majalisar dattawa, Godswill Akpabio; Kakakin majalisar wakilai Tajudeen Abbas; Mataimakin shugaban majalisar dattawa, Barau Jibrin; da sauran ‘yan majalisa a matakin kasa da jihohi.

Haka kuma an yabawa sarakunan gargajiya a fadin Najeriya, wadanda suka hada da Sarkin Musulmi, Shehun Borno, da Sarakunan Gwandu, Katsina, da Daura bisa nuna hadin kai.

Bayan haka, dangin sun nuna godiya ga shugabannin addini da na al’umma, kungiyoyin matasa, mata, ‘yan siyasa, ma’aikatan gwamnati, hukumomin tsaro, da kungiyoyin yada labarai da suka halarci jerin abubuwan da suka faru.

Manyan ‘yan kasuwa da suka hada da Aliko Dangote, Abdul Samad Rabiu, Muhammadu Indimi, Dahiru Mangal, Kola Adesina, da Nasiru Danu sun samu karbuwa saboda ziyarar ta’aziyyar da suka kai.

Shugaban kasa Muhammadu Buhari wanda ya jagoranci Najeriya daga 2015 zuwa 2023 ya rasu a kasar Ingila a farkon wannan wata. An yi jana’izarsa a mahaifarsa ta Daura, Jihar Katsina, kamar yadda addinin Musulunci ya tanada.