Rundunar ‘yan sanda ta kama wata matar aure ‘yar shekara 25 mai suna Rabi’a Labaran bisa zargin kashe matar aure a Daura.

Kakakin rundunar ‘yan sandan jihar Katsina, DSP Abubakar Aliyu ya tabbatar da faruwar lamarin a wata sanarwa da ya fitar ranar Lahadi.

A cewarsa, an kama matar mai shekaru 25 a gidan a ranar Asabar bayan da ‘yan sanda suka gudanar da bincike kan lamarin kisan da aka yi wa matar.

Matar mai suna Zainab Lawal mai shekaru 30 a duniya ta gamu da ajalinsu da yammacin ranar Asabar a gidansu da ke bayan makarantar firamare ta Dadi a unguwar Sabon Gari a cikin garin Daura.

Binciken ‘yan sanda kan kisan ya kai ga kama Rabi’a a ranar Asabar din da ta gabata.

Kakakin rundunar ‘yan sandan ya bayyana cewa, “Rundunar ‘yan sandan jihar Katsina, a ranar 24 ga watan Mayu, 2025, ta kama wata matar aure ‘yar shekara 25 da ake zargin tana da alaka da laifin kisan kai.

“Mummunan al’amari ya faru a bayan makarantar firamare ta Dadi da ke unguwar Sabon Gari a cikin garin Daura, cikin karamar hukumar Daura, inda ake zargin rikicin cikin gida tsakanin matan aure ya rikide zuwa fada mai muni.

“A ranar 24 ga Mayu, 2025, da misalin karfe 2300 (11pm), an samu rahoto a sashin Sabon Gari ta hannun wani maigidan Nasir Yusuf, cewa ya dawo gida daga kasuwa ya tarar da matarsa ​​ta farko, watau Zainab Lawal ‘F’ mai shekaru 30 a kwance cikin jini, an caka mata wuka sau da yawa.

“Bayan samun rahoton cikin gaggawa DPO din ya jagoranci tawagar jami’an tsaro zuwa wurin, inda daga nan ne aka garzaya da matar zuwa cibiyar kula da lafiya ta tarayya dake Daura domin kula da lafiyarta, inda likitan da ke bakin aiki ya tabbatar da rasuwar ta.

“A binciken da ake yi, an damke abokiyar aurenta mai suna Rabi’a Labaran ‘F’ ‘yar shekara 25, mai wannan adireshin, inda ta amsa laifin ta, inda ta bayyana cewa rashin fahimtar juna da marigayiyar ta haifar da rikici da kuma mummunan lamarin.

“Ana ci gaba da bincike.”

Kakakin rundunar ‘yan sandan ya kara da cewa kwamishinan ‘yan sandan jihar, Bello Shehu, ya bukaci jama’a da su guji duk wani abu na tashin hankali a cikin gida, kuma su guji daukar doka a hannunsu.

Ya kara da cewa kwamishinan ‘yan sandan ya bukaci jama’a da su nemi hanyoyin da shari’a za su bi domin ganin an magance tashe-tashen hankula, “domin yin taka tsantsan yana haifar da barna ne kawai da kuma lalata tsarin doka.