‘Yan kasuwar da ke gudanar da harkokin kasuwanci a kan titin Dutsinma a cikin birnin Katsina sun roki gwamnatin jihar da ta kawo musu dauki kan sanarwar korar da hukumar tsara birane da yanki ta jihar ta ba su.

Kakakin ’yan kasuwar, a karkashin inuwar Hadin Kai Multipurpose Society, Injiniya Abba Abbas Masanawa, ya yi wannan roko a lokacin da yake zantawa da manema labarai a Katsina.

Inji Injiniya Abba Abbas Masanawa, ya ce bisa la’akari da yawan mutanen da suke gudanar da sana’o’insu a kusa da Sabuwar Tasha Round Game da Karfe Rolling Mill Junction, roko ya zama dole domin kada a hana su muhallin da za su samu abin dogaro da kai.

Injiniya Abba Abbas ya bayyana cewa akwai mutane da dama da ke gudanar da sana’o’i na halal a wannan bangaren kuma suna bayar da gudunmawa sosai wajen samar da ayyukan yi ga matasa a yankin.

Har ila yau, wani Malam Halilu Umar ya bayyana cewa ‘ya’yan kungiyar na da shaguna da filayensu na tsawon shekaru kusan ashirin don haka akwai bukatar gwamnan jihar Malam Dikko Umar Radda ya sa baki a kan shirin korar da ake shirin yi da kuma taimakawa wajen dakile shirin rugujewar.

Da yake tsokaci kan batutuwan, Alhaji Umar Yusuf Tsauri, ya ce korar da rugujewar jama’a zai bar wa wadannan ‘yan kasuwa rashin aikin yi ta yadda za su kara talauci wanda sabon tsarin fatan gwamnatin jihar ke kokarin kawar da shi.

Haka kuma, sun ba da shawarar cewa gwamnati za ta iya samar musu da wani wurin da za su yi ciniki idan ba za ta iya dakatar da korar da rusasshen da hukumar tsara birane da yanki ta jihar ta shirya ba.