Gwamnan jihar Katsina, Malam Dikko Radda, ya bayyana kwarin guiwa ga jam’iyyar APC, biyo bayan nasarar da aka samu na tara kudade domin gudanar da zabukan kananan hukumomi masu zuwa.

Gwamnan ya bayyana hakan ne a yayin ziyarar godiyar da wata babbar tawaga da ta wakilci shiyyar Funtua a gidan gwamnati dake Katsina.

Gwamna Radda ya bayyana cewa, yawan halartar ’yan uwa da magoya bayansa masu dauke da kati na nuna farin jinin jam’iyyar.

Gwamnan ya yi alkawarin tabbatar da kula da albarkatun kasa tare da hadin gwiwar masu ruwa da tsaki a daidai lokacin da gwamnatinsa ke cika shekara ta biyu, inda ya bukaci ci gaba da addu’a da goyon baya daga al’ummar jihar Katsina.

Hakazalika, mataimakin gwamna Faruq Lawal Jobe ya amince da kudirin gwamnatin na ci gaban jihar, inda ya bayyana cewa an kashe sama da naira biliyan 120 a fannin ilimi kadai.

“Mayar da hankalinmu ya tsaya tsayin daka, kan bunkasa jarin bil’adama, ayyukan samar da ababen more rayuwa, da kuma shirye-shiryen karfafa dogaro da kai,” in ji Jobe, inda ya kara da cewa shiyyar Funtua za ta ci gaba da rike matsayinta na siyasa a jihar.

A nasa gudunmuwar ta daban, kakakin majalisar dokokin jihar Rt. Hon. Nasiru Yahaya Daura, ya yabawa tsarin jagoranci na bai-daya na Gwamna Radda, inda ya ce, “Tsarin nadin da gwamna ya yi na nadin mutane masu kishin kasa da rikon amana daga fadin jihar, ya kara kawo hadin kai a Katsina.

Tawagar karkashin jagorancin mataimakin shugaban jam’iyyar APC na jihar Alhaji Bala Abu Musawa ta wakilci kananan hukumomi goma sha daya a shiyyar Funtua. Musawa ya yaba da muhimman nade-naden da aka nada a baya-bayan nan da suka hada da Abdulkadir Mamman Nasir a matsayin shugaban ma’aikata da Malik Anas a matsayin kwamishina, wadanda suka zaburar da al’ummar yankin Funtua baki daya tare da yin rijistar godiya.

A nasa tsokaci, shugaban ma’aikata Nasiru, ya bayyana gwamna Radda a matsayin shugaba mai jajircewa, mai himma wajen isar da ababen more rayuwa a kan lokaci ga talakawa.

Tawagar ta hada da jiga-jigan siyasa kamar sakataren gwamnatin jihar Barr. Abdullahi Garba Faskari; Dan majalisar jiha Shamsuden Abubakar Dabai; Kwamishinan lafiya, Alhaji Musa Adamu Funtua; Mai shari’a Sadiq Abdullahi Mahuta mai ritaya; Kwamishinan harkokin addini, Shehu Isiyaku Dabai; Wakilin shugabannin kansilolin, Alhaji Bala Ado Faskari da sauran su.