Mataimaki na musamman ga gwamnan jihar kan wayar da kan jama’a, Alhaji Sabo Musa, ya jaddada muhimmiyar rawa da Marigayi Janar Shehu Musa ‘Yar’adua ya taka wajen samar da dimokuradiyyar Najeriya.

Sabo Musa ya bayyana haka ne a wata lacca da kungiyar Muryar Talaka Awareness Initiative reshen jihar Katsina ta shirya, wanda aka gudanar a Katsina.

Taron dai an yi shi ne domin tunawa da irin gudunmawar da Yar’adua ya bayar wajen ci gaban dimokuradiyyar kasar nan.

Alhaji Sabo Musa ya jaddada cewa tasirin ‘Yar’aduwa ga dimokuradiyyar Najeriya ba abu ne da za a iya musantawa ba, yana mai cewa “Babu tarihin dimokradiyyar Nijeriya da za a iya rubutawa ba tare da ambaton sunan Shehu ‘Yar’aduwa ba.

Ya bayar da shawarar shigar da tarihin ‘Yar’aduwa a cikin manhajar karatu na kasar nan, don tabbatar da cewa al’umma masu zuwa su fahimci abin da ya bari.

Shugaban kungiyar ‘yan jarida ta Najeriya reshen jihar Katsina, Kwamared Tukur Hassan Dan-Ali, kuma mamba mai wakiltar Rimi-Charanchi-Batagarawa, wanda Dr. Muhammad Haruna Tsagero ya wakilta, ya bayyana godiyarsu ga wadanda suka shirya taron bisa hangen nesa da suka yi wajen gudanar da taron.

Sakataren kungiyar Muryar Talaka na kasa, Kwamared Bashir Dauda Sabuwar Unguwa, ya bayyana muhimmancin taron wajen nuna irin gwagwarmayar da ‘Yar’aduwa ya yi da kuma irin gudunmawar da ya bayar ga dimokradiyyar Nijeriya, tun daga tushe har zuwa matakin kasa.

Marigayi Janar Shehu Musa ‘Yar’aduwa fitaccen Janar ne kuma dan siyasa wanda ya taba zama mataimakin shugaban kasar Najeriya daga 1976 zuwa 1979.

Jagorancinsa da hangen nesansa sun taka muhimmiyar rawa wajen tsara tsarin dimokuradiyyar kasar.