Gwamnan jihar Katsina, Malam Dikko Radda ya kaddamar da kwamitin al’umma da zai tantance yadda ake aiwatar da ayyukan raya kasa a jihar Katsina.

Gwamna Radda ne ya gudanar da bikin kaddamarwar a hukumance a yau, a dakin taro na karamar hukumar.

Gwamnan ya sanar da cewa a yanzu ‘yan uwa za su kasance suna da rawar farko wajen tantance ayyuka da shirye-shirye na yankunansu.

“Kwamitocin za su kunshi wakilai daban-daban da suka hada da ’yan kungiyar Darika da Izala da kungiyoyin matasa da mata da jami’an tsaro na kananan hukumomi da kansiloli da manyan jami’an kananan hukumomi,” Gwamnan ya bayyana.

Gwamna Radda ya jaddada cewa, sabuwar hanyar za ta shafi muhimman ayyukan gwamnati, da suka hada da rabon injinan wutar lantarki da za a yi nan gaba, da famfunan tuka-tuka, da kiwo, da sauran kayayyakin amfanin gona.

Gwamnan ya ci gaba da cewa, kwamitocin matakin al’umma ne za su dauki nauyin zakulo wadanda za su ci gajiyar shirin, tare da karfafa gwiwar ‘yan kungiyar da su tabbatar da wadanda suka cancanta kawai za a yi la’akari da su.

Gwamnan ya bada tabbacin cewa babu wani jami’in gwamnati ko dan siyasa ko wani mai fada a ji da zai iya yin katsalandan ko yin amfani da ayyukan kwamitin, ta yadda za a tabbatar da tsarin dimokuradiyya na gaskiya da adalci.

Da yake jawabi a wajen kaddamarwar, kwamishinan kudi na jihar, mai kula da ma’aikatar kananan hukumomi da masarautu, Malam Bashir Tanimu Gambo, ya bayyana yadda shirin zai taimaka wajen tabbatar da gaskiya da rikon amana.

Gambo ya bayyana cewa jihar ta gudanar da shirye-shiryen wayar da kan jama’a a dukkanin kananan hukumomi 27 domin bayyana karfin kwamitocin da iyakokin.

Shima da yake jawabi, kodinetan shirin cigaban al’umma na jiha, Dokta Kamaludeen Kabir ya bayyana kwamitocin matakin al’umma a matsayin wani shiri na hangen nesa da aka tsara don samar da alkiblar manufofi da tsarin aiwatar da kasafin kudi tare da halartar masu zabe baki daya.

Dokta Kamaludeen ya bayyana cewa shirin ya kunshi muhimman abubuwa: kwamitin gudanarwa karkashin jagorancin gwamna, kwamitin tsare-tsare na hadin gwiwa karkashin jagorancin mataimakin gwamna da kuma kwamitin matakin al’umma da ke da alhakin tantance ayyukan.

“A wani bangare na shirin, sama da ma’aikatan kananan hukumomi 1,083 ne aka horas da su a sassan mazabu 361 na jihar don tallafawa tsarin ci gaban al’umma,” in ji Dokta Kamaludeen.

Ko da yake yana da kyau a lura cewa sabon kwamitin matakin al’umma da aka kaddamar yana cikin tsarin gudanar da ayyukan ci gaban al’ummar jihar Katsina (KSCDP) da aka kaddamar tun a ranar 21 ga watan Nuwamba, 2024 da gwamnatin Gwamna Radda ke jagoranta.