Kungiyar Malaman Jami’o’i (ASUU) ta nuna damuwarta kan mutuwar mambobinta 84 a cikin watanni uku, inda ta bayyana matsalar tattalin arziki da rashin biyan albashi a matsayin muhimman abubuwa kamar yadda ta bayar da wa’adin kwanaki 14 ga Gwamnatin Tarayya a ranar 25 ga watan Satumba. 2024, inda ta bukaci a warware wasu batutuwa da suka hada da sake tattaunawa kan yarjejeniyar FGN/ASUU na 2009 da kuma biyan albashin da aka hana daga yajin aikin 2022.

Shugaban ASUU, Emmanuel Osodeke ne ya bayyana haka a wata hira da ya yi da Laolu Akande a gidan talabijin na Channels TV.

Ya ce, “A cikin watanni uku da suka gabata, daga watan Mayu zuwa Agusta (2024), jami’o’in Najeriya sun yi asarar malamai 84 har lahira. A cikin wata uku, saboda abin da mutanenmu ke ciki.”

“Duk da wannan rikicin, kuna rike da albashin wani mutum uku da rabi ko sama da haka a kan babu aiki, babu biya, kuna bin wannan kudin.

“Mutane na kokarin tsira, kun bullo da karin man fetur, kun bullo da karin wutar lantarki, kuma komai ya tafi yanzu.”

A ranar 25 ga Satumba, 2024, ASUU ta bayar da wa’adin kwanaki 14 ga Gwamnatin Tarayya, inda ta bukaci a warware wasu batutuwa da suka hada da sake tattaunawa kan yarjejeniyar FGN/ASUU na 2009 da kuma biyan albashin da aka hana daga yajin aikin 2022.

A shekarar 2022, kungiyoyin ilimi da na jami’o’i sun shiga yajin aikin na tsawon watanni takwas, daga nan ne gwamnati ta aiwatar da tsarin na rashin aiki, babu biyan albashi. Daga baya shugaba Bola Tinubu ya amince da sakin albashin watanni hudu a watan Oktoban 2023, amma ASUU ta dage cewa dole ne a biya dukkan albashin watanni takwas da aka hana.

‘Yan kungiyar ASUU sun samu watanni hudu na albashinsu, yayin da sauran kungiyoyin kamar SSANU da NASU, har yanzu ba a biya su ba. Gwamnati na duba yiwuwar biyan rabin albashi ga kungiyoyin da ba na ilimi ba, a cewar ministan ilimi, Tahir Mamman.

Osodeke ya bayar da hujjar cewa biyan watanni hudu kacal ba alheri ba ne, yana mai cewa malamai sun cancanci cikakken biya na tsawon lokacin yajin aikin.

A yayin da wa’adin kwanaki 14 ke kara kusantowa akwai fatan gwamnati za ta mayar da martani mai kyau don hana rufe makarantunmu a irin wannan lokaci da kasar nan ke nishi cikin matsanancin nauyi da bai kamata ba.