Gwamnan jihar Katsina Dikko Radda ya karbi bakuncin babban hafsan sojojin Najeriya Laftanar Janar Taoreed A. Lagbaja a fadar gwamnati dake Katsina.

Ziyarar, wani bangare ne na rangadin ayyukan rundunar ta Laftanar Janar Lagbaja, ta maida hankali ne kan inganta matakan tsaro da ayyukan soji a jihar.

A yayin ganawar, Gwamna Radda ya yi kira ga hukumomin sojin Najeriya da su tabbatar da daukar matakin gaggawa kan kiraye-kirayen da suke yi a duk yankunan da suke aiki a jihar.

Ya jaddada mahimmancin yanayin daukar matakin gaggawa na ceto ‘yan uwa yayin hare-haren masu laifi.

Gwamna Radda ya bayyana jin dadinsa da ziyarar da babban hafsan sojin kasa da na hafsoshin tsaro suka kai a cikin mako guda, inda ya ce, wadannan ziyarce-ziyarcen sun nuna matukar damuwar gwamnatin tarayya kan matsalar tsaro a jiharmu.

Ya kuma yabawa dagewar da sojojin Najeriya suka yi na magance matsalolin tsaro a Katsina.

Hakazalika Gwamna Radda ya yi karin haske kan tasirin ayyukan tsaro na hadin gwiwa, yana mai cewa, “Hadin gwiwar jami’an tsaro ya haifar da ingantaccen tsaro, wanda hakan ya baiwa manoma da dama damar noma gonakinsu a wannan lokacin noman.”

Sai dai ya yi kira da a kara daukar matakai don tabbatar da cewa manoma za su iya jigilar amfanin gonakinsu gida lafiya.

Da yake jawabi ga al’umma dangane da hare-haren, Gwamna Radda ya bayyana ci gaba da kokarin wayar da kan jama’a da kuma umarni ga malaman addini domin wayar da kan jama’a kan muhimmancin kare kai.

A nasa jawabin, Laftanar Janar Lagbaja ya bayyana cewa ziyarar tasa wani bangare ne na rangadin tsarin aikin soji domin tantance ayyukan da alakar soji da fararen hula. Ya bayyana kwarin gwiwar cewa za a iya shawo kan kalubalen tsaro ta hanyar hadin gwiwa.

Shugaban rundunar ya yaba da kokarin Gwamna Radda bisa goyon bayan da ya ke baiwa rundunonin soji a jihar. “Na zo ne domin in gode muku kan abin da kuke yi na ganin an dakile matsalar tsaro a Katsina, na san kun kafa hukumar tsaro ta al’ummar Katsina, tare da samar da yanayin da zai taimaka wajen ganin an dakile matsalar rashin tsaro a jihar,” in ji Janar Lagbaja.

A ci gaba da hakan, shugaban rundunar ya bukaci gwamnatin jihar ta taimaka wajen kara wayar da kan ‘yan kasa kan muhimmancin tallafawa da hada kai da sojoji domin magance matsalolin tsaro yadda ya kamata.

Janar Lagbaja ya kammala da mika ta’aziyya ga gwamnati da al’ummar jihar Katsina bisa rasuwar Hajiya Dada Musa Yar’adua, mahaifiyar tsohon shugaban kasa Umaru Musa Yar’adua.