Ma’aikatar lafiya ta jihar Katsina tare da hadin gwiwar ma’aikatar kudi sun shirya taron karawa juna sani kan abinci mai gina jiki.

Shirin inganta sakamakon abinci mai gina jiki a Najeriya, Accelerating Nutrition Results in Nigeria project (ANRiN) a ma’aikatar lafiya ta jihar Katsina tare da hadin gwiwar ma’aikatar kasafin kudi da tsare-tsare ta jihar Katsina sun shirya wata tattaunawa ta musamman da masu ruwa da tsaki ciki har da majalisar dokoki.

Kungiyar shugabannin kananan hukumomin jihar Katsina, domin wayar da kan jama’a kan muhimmancin al’amuran da suka shafi abinci mai gina jiki a cikin kasafin kananan hukumomin jihar Katsina.

Kakakin majalisar dokokin jihar Katsina, Alhaji Nasir Yahaya Daura, a lokacin da yake jawabi a wajen bude taron, ya tabbatar da cewa majalisar dokokin jihar Katsina ta dukufa wajen tallafa wa hukumomin gwamnati da abokan huldar ci gaba wajen inganta rayuwar al’ummarmu.

A cewarsa, sun fahimci mahimmancin abinci mai gina jiki don inganta rayuwar al’ummarmu, musamman yara da mata.

Ya yabawa ofishin ANRiN da ma’aikatar kasafin kudi da tsare-tsare ta tattalin arziki bisa kokarinsu na shirya wannan taron bita.

Shima a nasa jawabin kwamishinan kasafin kudi da tsare-tsare na jihar Katsina Hon. Bello Kagara, ya bayyana fa’idar abinci mai gina jiki ga yara, wanda ya shaida cewar gwamnatin jihar Katsina tun kafuwarta ta taimaka wajen ci gaban wannan fanni.

A wajen taron shugaban shirin ANRiN na jihar Katsina, Dakta Umar Bello, ya bayyana makasudin taron karawa juna sani da wayar da kan masu ruwa da tsaki, musamman shugabannin kananan hukumomin jihar Katsina, kan muhimmancin ware wani kaso mai tsoka. na kasafin kudin abinci na kananan hukumomi saboda mahimmancinsa ga kananan yara.

Ya shaida cewar wannan shirin na da nufin kara yawan cin abinci mai gina jiki ga mata masu juna biyu da masu shayarwa.

Ya bayyana cewa a halin yanzu kananan hukumomi 18 a Katsina da suka kunshi cibiyoyin lafiya a matakin farko 188 ne ke cin gajiyar shirin.

Wasu daga cikin ayyukan da shirin ya bayar sun hada da samar da sinadarin Vitamin A ga yara ‘yan kasa da shekaru biyar, folic acid ga mata masu juna biyu, ORS acid na rigakafin gudawa da dai sauransu.

Wadanda suka bayar da gudumawa a wajen taron bitar sun hada da kwamishinan ma’aikatar kananan hukumomin jihar Katsina, Farfesa Badamasi Charanchi, wakilin kungiyoyin sa kai, shugaban kwamitin kasafin kudi na majalisar dokokin jihar Katsina, Alhaji Lawal Jikamshi da sauran su.

Majalisar dokokin jihar Katsina a yayin bitar ta tabbatar da cewa za ta bayar da kowace irin gudumawa wajen samar da dokar da za ta inganta harkar abinci mai gina jiki a jihar Katsina.