Gwamnatin jihar Jigawa ta kaddamar da kwamitin shirya gasar karatun Alkur’ani ta marayu ta kasa da aka shirya gudanarwa tsakanin ranakun 2 zuwa 12 ga watan Agusta, 2024.

Hakan na kunshe ne a cikin wata sanarwa da jami’in hulda da jama’a na gidauniyar Aytam Global Care Charity Foundation Muhammad Halilu Ibrahim ya fitar wanda ya jaddada aniyarsa na samun nasarar gudanar da bukin karo na uku na shekara-shekara.

Da yake kaddamar da Kwamitin Gwamnan Jihar Jigawa Alhaji Umar Namadi wanda Sakataren Zartaswa na Hukumar Ilimi ta Jihar, Dakta Mubarak Abdulwahab Hassan ya wakilta ya hori mambobin da su yi rayuwa a sama.

Gwamnan wanda ya bayyana cewa an zabo mambobin ne cikin tsanaki bisa la’akari da tarihinsu na kwarewa da gaskiya da kuma kwazon aiki. Ya ce gwamnatin jihar za ta samar musu da duk wani kayan aiki da suka dace domin gudanar da aikin yadda ya kamata.

Da yake jawabi a wajen kaddamar da gasar a madadin kungiyar agaji ta National Aytam Global Charity Care Foundation na kasa mataimakin shugaban kungiyar Malam Nura Alkali Talatar Mafara ya yabawa gwamnatin jihar Jigawa bisa amincewa da karbar bakuncin gasar.

Malam Alkali wanda ya taya mambobin kwamitin murna, amma ya yi kira gare su da su ba da kulawa ta musamman ga wurin da za a gudanar da gasar, masauki da kuma ciyar da mahalarta gasar domin yin atisaye na kyauta.

Kwamitin mutum goma sha hudu na karkashin jagorancin Dr. Kadi Bala Musa Kazaure yayin da Muhammad Bn. Abdulhamid yayi aiki a matsayin Sakatare Janar.

Sauran membobin sun hada da Dr. Mubarak Abdulwahab Hassan, Dr. Salisu Ismail, Malam Shisu Ibrahim Doko, Malam Sani Maje Saleh da Hon. Ahmad Saleh Birniwa.

Sauran sun hada da Jibril Umar Zakar, Rabi’u Muhammad, Hajiya T. Abdulwhab, Hajiya Zainab Shuaibu Rabo da Hajiya Hauwa Garba.

Ana sa ran bugu na uku na gasar kasa da kasa mai taken “Jigawa 2024” za ta samu mahalarta daga sassan kasar.