Wadanda suka sace Hajiya Hauwa’u Adamu, mahaifiyar fitaccen mawakin Hausa, Dauda Adamu wanda aka fi sani da Rarara, sun nemi a biya ta kudin fansa Naira miliyan 900 kafin su ba ta ’yanci.

Wata majiya da ke kusa da dangin ta ce masu garkuwa da mutanen sun tuntubi iyalan kuma da farko sun bukaci a biya su Naira biliyan daya.

Kafar yada labarai ta ruwaito majiyar tana cewa:  “Sun kira ‘yan uwa da wayar wata mata da ‘yan fashin suka tara a lokacin da suka zo daukar Hajiya. Sun bukaci N1bn amma bayan takaitacciyar tattaunawa da wani dan uwa sai suka rage kudin zuwa N900million.

“Da farko sun bukaci a kulla yarjejeniya da Rarara da kansa saboda ya ji rashin lafiya bayan sace mahaifiyarsa. Sun amince su kulla yarjejeniya da wani dan gidan. Sun tabbatarwa yan uwa cewa Hajiya tana cikin koshin lafiya kuma da zarar an biya kudin za a sallame ta.

“Tattaunawar da aka yi tsakanin ‘yan bindigar da ‘yan uwa ‘yar gajeru ce, kuma tun daga lokacin ba su sake yin waya ba. Amma na yi imani har yanzu ana ci gaba da tattaunawa. Don haka, dangi har yanzu suna jiran kiran ‘yan fashin don ci gaba da tattaunawa.

“Mun samu labarin cewa bayan sun shiga dakin kwananta, sai suka tadda dukkan matan da suke kwana tare da ita suka fara kwatanta fuskokinsu da hoton.”

A baya KatsinaMirror ta rahoto cewa jami’an rundunar ‘yan sandan jihar Katsina sun tabbatar da kama wasu mutane biyu da ake zargi da hannu a sace Hajiya Ibrahim, mahaifiyar fitaccen mawakin nan Dauda Kahutu, wanda aka fi sani da Rarara a kwanakin baya.

Rundunar ‘yan sandan ta bayyana hakan ne a wata sanarwa da kakakin rundunar ‘yan sandan, ASP Abubakar Sadiq Aliyu ya fitar, inda ta ce jami’an hukumar na yi wa mutanen biyu tambayoyi.

Sanarwar ta ci gaba da cewa, “A yau Juma’a 28 ga watan Yuni, 2024, da misalin karfe 0130 ne aka samu labari a hedikwatar ‘yan sanda ta Danja cewa wasu da ake zargin masu garkuwa da mutane ne suka mamaye gidan wata mai suna Hauwa’u Adamu mai shekaru 75 a duniya. A kauyen Kahutu, karamar hukumar Danja, jihar Katsina, suka yi garkuwa da ita.

“Bayan samun rahoton, nan take DPO Danja ya jagoranci tawagar jami’an tsaro zuwa wurin da lamarin ya faru da nufin kamo masu laifin tare da kubutar da wanda abin ya shafa ba tare da wani rauni ba.

“A yayin gudanar da bincike, an kama mutane biyu da ake zargi da yin tambayoyi. Za a sanar da ƙarin ci gaban nan gaba yayin da bincike ya ci gaba, “in ji shi.