Jami’an rundunar ‘yan sandan Katsina sun ceto wata yarinya ‘yar wata shida tare da mata uku daga hannun ‘yan bindiga a ranar Idi- El-kabir a karamar hukumar Jibia ta jihar Katsina.

Lamarin ya faru ne da sanyin safiyar Lahadi a unguwar Kwata da ke karamar hukumar.

Kakakin rundunar, ASP Abubakar Aliyu ya tabbatar da faruwar lamarin a wata sanarwa da ya fitar a yammacin Lahadi.

Ya bayyana cewa “Rundunar ‘yan sandan jihar Katsina ta samu nasarar dakile wani harin da ‘yan bindiga suka kai a unguwar Kwata da ke karamar hukumar Jibia ta jihar Katsina tare da kubutar da mata uku (3) da aka yi garkuwa da su da wani jariri dan watanni shida.

“A ranar 16 ga watan Yuni, 2024 da misalin karfe 4.15 na safe ne aka samu kiran gaggawa a hedikwatar ‘yan sanda ta Jibia, inda wasu ‘yan bindiga dauke da muggan makamai suka kai hari a unguwar Area, karamar hukumar Jibia tare da yin garkuwa da mata uku (3) da jariri dan wata shida.

“Bayan samun rahoton, nan take DPO Jibia ya tattaru ya jagoranci tawagar jami’an tsaro zuwa wurin inda suka yi artabu da ‘yan bindigar, inda suka dakile yunkurin yin garkuwa da su.

“A yayin aikin ceto, rundunar ta yi nasarar ceto dukkan matan da aka yi garkuwa da su, ciki har da wata jaririya mai wata shida da ba ta ji rauni ba.

“Ana ci gaba da kokarin ganin an kama wadanda ake zargi da guduwa.”

Sanarwar ta kara da cewa kwamishinan ‘yan sandan jihar, Aliyu Musa ya yabawa jarumtaka da daukar matakin gaggawa na jami’an.

Kwamishinan ‘yan sandan ya kuma kara jaddada aniyar rundunar na kare rayuka da dukiyoyin mazauna jihar Katsina.