Gwamnan jihar Katsina, Malam Dikko Radda a ranar Asabar ya amince da abin da ya kira kwandon Sallah na naira dubu arba’in da biyar (₦45,000) ga daukacin ma’aikatan jihar da ma’aikatan kananan hukumomi.

Wata sanarwa da ma’aikatar yada labarai da al’adu ta jihar ta fitar ta ce matakin ya nuna jin dadinsa ga kwazon da ma’aikatan suka yi wajen yi wa jihar hidima.

Sanarwar ta bayyana cewa, kwandon Sallah an yi shi ne domin tallafa wa ma’aikata a lokutan bukukuwa da kuma nuna irin gudunmawar da suke bayarwa wajen ci gaban jihar.

A cikin sanarwar, Radda ya bayyana jin dadinsa da irin namijin kokarin da ma’aikatan suke yi na ci gaban jihar.

Gwamnan ya kuma jaddada aniyar gwamnatin sa na ba da fifiko kan jin dadin ma’aikata da inganta yanayin aikinsu.

Za a raba kwandon Sallah ne ga dukkan ma’aikatan jihar da ma’aikatan kananan hukumomi.

Sanarwar ta bayyana cewa, “a cikin Naira dubu arba’in da biyar da aka amince da su, Naira dubu goma sha biyar kyauta ce ga ma’aikaci, yayin da Naira dubu talatin kuma rance ne ga ma’aikata, wanda za a biya a kowane wata na watanni uku, daga watan Yuli. zuwa Satumbar bana.”

Gwamna Dikko ya ce “Yayin da muke shirin gudanar da bukukuwan Sallah mai albarka, na yi farin cikin sanar da nuna godiya ta musamman ga ma’aikatanmu masu himma, sadaukarwar ku da jajircewar ku ga wannan jiha tamu ba ta wuce gona da iri ba.

“Baya ga wannan kyautar Sallah, mun himmatu wajen ci gaba da inganta jin dadin ku da yanayin aiki. Za mu ci gaba da ba ku fifiko tare da tabbatar da cewa kun sami tallafin da kuka cancanci.”

Gwamnan ya yi wa mazauna Katsina fatan an yi Sallah lafiya da nisan kwana.

Ya kuma bayyana “A nan ina mika sakon gaisuwata gare ku baki daya a cikin wannan biki mai cike da farin ciki. Da fatan wannan biki na Sallah ya kawo farin ciki, zaman lafiya, da wadata a gare ku da masoyanku, Allah ya albarkaci jiharmu.”

Kwamishinan yada labarai da al’adu na jihar, Bala Zango ne ya sanya hannu kan sanarwar.